قازاقستاندا پرەزيدەنت قاسىم-جومارت توقاەۆتىڭ توراعالىعىمەن وتكەن قاۋىپسىزدىك كەڭەسىنىڭ وتىرىسىندا ماقۇلدانعان اسكەري رەفورما جوسپارىن جۇزەگە اسىرۋ باستالدى.
وزگەرىستەر قارۋلى كۇشتەردىڭ قۇرىلىمىن، اسكەري باسقارۋ جۇيەسىن، اسكەرلەردىڭ دايارلىعىن، اسكەري قىزمەت وتكەرۋ ءتارتىبىن جانە اسكەري قىزمەتشىلەردىڭ قۇقىعىن قورعاۋ ماسەلەلەرىن قامتيدى.
مەملەكەت باسشىسى زاماناۋي، ۇتقىر ءارى تەحنولوگيالىق تۇرعىدان دامىعان ارميا قالىپتاستىرۋ مىندەتىن قويدى. بۇل رەتتە اسكەري قىزمەتتىڭ قاۋىپسىزدىگىنە، كومانديرلىك مادەنيەتكە جانە مەملەكەتتىك رەسۋرستاردى ءتيىمدى پايدالانۋعا ەرەكشە نازار اۋدارىلادى.
قارۋلى كۇشتەردىڭ قۇرىلىمى مەن قۇرامى، قورعانىستى جوسپارلاۋ، جۇمىلدىرۋ دايىندىعى جانە رەزەرۆتى قالىپتاستىرۋ جۇيەسى سىندى ارميانىڭ نەگىزگى قۇرامداس بولىكتەرىن جەتىلدىرۋ جوسپارلانىپ وتىر.
تەحنولوگيالىق قايتا جاراقتاندىرۋ وتاندىق قورعانىس ونەركاسىبىن دامىتۋمەن، ونىڭ ىشىندە ۇشقىشسىز قۇرالدارعا قارسى ءىس-قيمىل قۇرالدارىن وندىرۋمەن، سونداي-اق جاساندى ينتەللەكت پەن تسيفرلىق شەشىمدەردى ەنگىزۋمەن قاتار جۇزەگە اسىرىلماق.
اسكەرلەردىڭ دايىندىق ساپاسىن ارتتىرۋ جانە اسكەري وقۋ-جاتتىعۋلاردى وتكىزۋگە جۇمسالاتىن شىعىنداردى ازايتۋ ماقساتىندا ۇرىس قيمىلدارىن مودەلدەۋگە مۇمكىندىك بەرەتىن سيمۋلياتسيالىق باعدارلامالاردى ەنگىزۋ كوزدەلىپ وتىر. ەندى اسكەري قىزمەتشىلەردىڭ جاڭا تاكتيكانى مەڭگەرۋىن، زاماناۋي قارۋ-جاراق ۇلگىلەرىن قولدانۋىن ەسكەرە وتىرىپ، ولاردىڭ ءوز بەتىنشە دە، بولىمشەلەر قۇرامىندا دا سەنىمدى ارەكەت ەتۋ داعدىلارىن قالىپتاستىرۋعا ەرەكشە نازار اۋدارىلادى.
نەگىزگى وزگەرىستەردىڭ ءبىرى – مەرزىمدى اسكەري قىزمەتتىڭ ەكى كەزەڭدى مودەلىنە كوشۋ. العاشقى التى ايدا ءبىر شاقىرىلىمداعى ساربازدار وقۋ ورتالىقتارىندا بولىپ، اسكەري قىزمەتكە بەيىمدەلەدى، باستاپقى اسكەري ءبىلىم الادى جانە دەنە دايىندىعىن شىڭدايدى. وقۋ ۇدەرىسى اياسىندا ساربازدار ءتىل ۇيرەنىپ، جاساندى ينتەللەكتىنى پايدالانۋ داعدىلارىن دامىتا الادى. سونىمەن قاتار اسكەري قىزمەتشىلەر اسكەري ماماندىقتارمەن قاتار، ەڭبەك نارىعىندا سۇرانىسقا يە ازاماتتىق جۇمىسشى كاسىپتەرىن دە مەڭگەرە الادى.
كەلەسى التى ايدا اسكەري قىزمەتشىلەر اسكەري بولىمدەردە قىزمەت اتقارىپ، جاۋىنگەرلىك دايارلىعىن جەتىلدىرىپ، بولىمشە قۇرامىندا قويىلعان مىندەتتەردى ورىندايدى. جاڭا مودەلدىڭ جەكەلەگەن ەلەمەنتتەرى «Sarbaz+» جوباسى اياسىندا سىناقتان وتكىزىلدى. ەكى كەزەڭدى مەرزىمدى اسكەري قىزمەت مودەلىنىڭ پيلوتتىق جوباسىن 2027 جىلى ىسكە قوسۋ جوسپارلانعان.
اسكەري قىزمەت وتكەرۋ جاعدايلارىن جاقسارتۋعا جانە اسكەري قىزمەتشىلەردى الەۋمەتتىك قورعاۋعا ەرەكشە كوڭىل بولىنەدى. سونداي-اق اسكەري بولىمدەردىڭ قولباسشىلىعىنا تاۋەلسىز اسكەري كەڭەسشىلەر ينستيتۋتىن قۇرۋ كوزدەلىپ وتىر. ولار اسكەري قىزمەتشىلەرگە قولداۋ كورسەتىپ، قۇقىق بۇزۋشىلىقتاردى انىقتاۋعا جانە ولاردىڭ زاڭدى مۇددەلەرىن قورعاۋعا كومەكتەسەدى.
باسىم مىندەتتەردىڭ ءبىرى – اسكەري قىزمەتشىلەردى ساپالى تاماقپەن جانە اسكەري كيىم-كەشەكپەن قامتاماسىز ەتۋ. سونىمەن قاتار كازارمالار قورىن، وقۋ نىساندارى مەن اسكەري پوليگونداردى جوندەۋ جانە قالپىنا كەلتىرۋ دە جوسپارلانۋدا.
وزگەرىستەر جاستاردى دايارلاۋ جۇيەسىن دە قامتيدى. 2027 جىلدان باستاپ «جاس قىران»، «جاس ۇلان» جانە «جاس سارباز» كەزەڭدەرىن بىرىكتىرەتىن «جاس ايبىن» بىرىڭعاي اسكەري-پاتريوتتىق دايارلاۋ جۇيەسىن قۇرۋ كوزدەلگەن. قاۋىپسىز مىنەز-قۇلىق داعدىلارىن قالىپتاستىرۋ، العاشقى كومەك كورسەتۋ مەن توتەنشە جاعدايلار كەزىندە ارەكەت ەتۋگە ۇيرەتۋ مەكتەپتەن باسيالماق.
اكىمدىكتەرمەن بىرلەسىپ، جالپى ءبىلىم بەرەتىن وقۋ ورىندارىندا العاشقى اسكەري دايىندىقتىڭ ساپالى جۇرگىزىلۋىن قامتاماسىز ەتۋ، سونداي-اق مامانداندىرىلعان اسكەري مەكتەپتەر جەلىسىن دامىتۋ جۇمىستارى جالعاسادى.
جوسپاردىڭ ۇيىمداستىرۋشىلىق ءىس-شارالارىن جىل سوڭىنا دەيىن جۇزەگە اسىرۋ كوزدەلگەن، ال نەگىزگى تۇجىرىمدامالىق وزگەرىستەر ورتا مەرزىمدى پەرسپەكتيۆادا ىسكە اسىرىلادى. قورعانىس مينيسترلىگى اسكەري رەفورمانىڭ جۇزەگە اسىرىلۋ بارىسى تۋرالى قوعامدى تۇراقتى تۇردە حاباردار ەتىپ وتىرادى.
