اسكەرگە ساپ-ساۋ كەتىپ، ەسىنەن ايىرىلعان كۇيدە ورالعان قىزىلوردالىق سارباز اناسىن تانىدى، دەپ حابارلايدى "ادىرنا" ۇلتتىق پورتالى Turkystan.kz سايتىنا سىلتەمە جاساپ.
19 جاستاعى رەنات جەتكەرگەنوۆ اسكەردەن ورالعاننان كەيىن تۋىستارىن تاني الماعان بولاتىن.
رەناتتىڭ اناسى ايعانىم ءىزباساروۆا ۇلى ەمدەلىپ جاتقان قىزىلوردا وبلىستىق پسيحيكالىق دەنساۋلىق ورتالىعىنا كۇن قۇرعاتپاي بارادى. انانىڭ قايعى-قاسىرەتىن كورىپ، دارىگەرلەر ۇلىن كورۋگە رۇقسات بەرىپتى.
«دارىگەرلەر رەناتتان: ءسىز بۇل ايەلدىڭ كىم ەكەنىن بىلەسىز بە؟ – دەپ سۇرادى. ول: «ءيا، بۇل – ايعانىم، انام، ول – مۇعالىم»، – دەپ جاۋاپ بەردى. بىراق ۇلىممەن سويلەسۋگە ۋاقىتىم بولمادى، ول باسى قاتتى اۋىرىپ كەتكەنىن ايتقان سوڭ، دارىگەرلەر ونى الىپ كەتتى»، – دەيدى ايعانىم ءىزباساروۆا.
ول ۇلىن الدىمەن نۇر-سۇلتان نەمەسە الماتىداعى بىلىكتى ماماندارعا قاراتۋدى جوسپارلاپ وتىر. ودان سوڭ كىنالىلەر جازاسىن السا دەيدى. قازىرگى تەرگەۋ جۇمىستارىنا انانىڭ كوڭىلى تولمايدى.
ەسكە سالا كەتەيىك، رەنات جەتكەرگەنوۆ اقتاۋداعى 25/744 تەڭىز فلوتىندا اسكەري بورىشىن وتەگەن بولاتىن. مەرزىمىنىڭ اياقتالۋىنا 8 كۇن قالعاندا، «ءسال اۋىرىڭقىراپ» قالدى دەگەن سىلتاۋمەن ونى ۇيىنە قايتىرىپتى. رەناتتى كۇتىپ العان اتا-اناسى ۇلدارىن كورىپ جاعالارىن ۇستاعان: ۇستىندەگى كيىمى – شۇرىق-تەسىك، اياعىندا جازدىق تاپىشكە بولعان. وتان الدىنداعى بورىشىن وتەپ ەمەس، قۇددى قۇلدىقتا جۇرگەندەي ورالدى، دەيدى اعاسى. كۇدىكتەنگەن تۋىستارى جىگىتتى اۋرۋحاعا اپارىپ تەكسەرتكەن. دارىگەرلەر باسىنان سوققى العانىن ايتقان.
ال قورعانىس مينيسترلىگىنىڭ وكىلى مۇنىڭ بارلىعىن جوققا شىعارعان ەدى. ولار رەنات اسكەر قاتارىنا قابىلدانعاندا دەنساۋلىعى جاقسى بولعانىن، اسكەردە دە وعان ەشكىم تيىسپەگەنىن ايتتى.
دەگەنمەن، كازارمادا نە جاعداي بولعانى بەلگىسىز. رەناتتىڭ دا جاعدايدى تۇسىندىرۋگە شاماسى جوق. ال ساربازدىڭ ەت جاقىندارى ايىپتىلاردى تاۋىپ، ءادىل جازا بەرۋدى تالاپ ەتپەكشى.
"ادىرنا" ۇلتتىق پورتالى
