الداعى ەكى جىلدا اتىراۋ وبلىسىنىڭ بارلىق اۋىلدىق وكرۋگى سپورتتىق ينفراقۇرىلىممەن قامتاماسىز ەتىلەدى.
بۇل تۋرالى ايماق باسشىسى سەرىك شاپكەنوۆ سپورتتىق ينفراقۇرىلىمدى دامىتۋ جانە بۇقارالىق سپورتتى ىلگەرىلەتۋ ماسەلەلەرىنە ارنالعان ۇكىمەت وتىرىسىندا ايتتى.
بۇگىندە وڭىردە 800 سپورت نىسانى جۇمىس ىستەيدى. ولاردىڭ قاتارىندا 8 ستاديون، 53 سپورت كەشەنى، 702 سپورت الاڭى، 50 مەترلىك وليمپيادالىق باسسەين، «اتىراۋ» سپورت سارايى، تەننيس ورتالىعى جانە مۇز سارايى سىندى ءىرى نىساندار بار. بۇعان قوسا، 17 جەكە سپورت نىسانى حالىق يگىلىگىنە قىزمەت كورسەتىپ كەلەدى.
جىل اياعىنا دەيىن وبلىستىڭ 68 اۋىلدىق وكرۋگىنىڭ 70 پايىزى سپورت نىساندارىمەن قامتىلماق. ال الداعى ەكى جىل ىشىندە بارلىق اۋىلدىق وكرۋگ سپورتتىق ينفراقۇرىلىممەن تولىقتاي قامتاماسىز ەتىلەدى.
قازىر وبلىس اۋماعىندا 29 سپورت كەشەنىنىڭ قۇرىلىسى ءجۇرىپ جاتىر. ونىڭ 7-ەۋى پايدالانۋعا بەرىلدى، تاعى 6-اۋىنىڭ قۇرىلىسى جىل اياعىنا دەيىن بىتەدى. قالعان 16 نىساندى كەلەسى جىلى تاپسىرۋ جوسپارلانعان. اتىراۋ قالاسى مەن اۋىلدىق اۋدانداردا دەمەۋشىلەردىڭ ەسەبىنەن 4 سپورت نىسانى سالىنىپ جاتىر. ولاردىڭ قاتارىندا مامانداندىرىلعان ۆولەيبول جانە باسكەتبول ورتالىقتارى، سونداي-اق مۇقىر جانە كۋدرياشوۆ اۋىلدارىنداعى سپورت كەشەندەرى بار.
جوبالاردى ىسكە اسىرۋ ناتيجەسىندە حالىقتىڭ سپورتتىق ينفراقۇرىلىممەن قامتىلۋ دەڭگەيى 62 پايىزدان 70 پايىزعا جەتپەك.
دارىندى بالالاردى قولداۋ ماقساتىندا اتىراۋ قالاسىندا وليمپيادالىق رەزەرۆ مەكتەبى-ينتەرناتىنىڭ عيماراتىن سالۋ جوسپارلانعان. جوبا مەملەكەتتىك-جەكەمەنشىك ارىپتەستىك اياسىندا التى جىل مەرزىمدە جۇزەگە اسىرىلادى. ونىڭ ىشىندە 12 اي — قۇرىلىس، ال بەس جىل — تەحنيكالىق پايدالانۋ كەزەڭى. كەشەن قۇرامىندا 13 سپورت زالى، باسسەين، وقۋ كورپۋسى، جاتاقحانا، اسحانا، كىتاپحانا جانە باسقا دا نىساندار بولادى. مۇندا 12 وليمپيادالىق سپورت ءتۇرى بويىنشا 400 سپورتشى ءبىلىم الىپ، جاتتىعا الادى. قۇرىلىستىڭ 2026 جىلعى ساۋىردە باستالادى دەپ كۇتىلۋدە.
بيزنەس وكىلدەرىنىڭ الەۋمەتتىك جاۋاپكەرشىلىگى اياسىندا Texol كومپانياسى جالپى اۋماعى 19 مىڭ شارشى مەتردى قۇرايتىن سپورتتىق-ساۋىقتىرۋ كەشەنىنىڭ قۇرىلىسىن باستادى. مۇندا 12 سپورت تۇرىمەن اينالىسۋعا مۇمكىندىك تۋادى.
مەملەكەت باسشىسىنىڭ ۇلتتىق قۇرىلتايدا بەرگەن تاپسىرمالارىنا سايكەس، اتىراۋ وبلىسىندا حالىقارالىق دەڭگەيدەگى جارىستار وتكىزۋگە مۇمكىندىك بەرەتىن ءىرى سپورتتىق جوبالار ىسكە اسىرىلماق. ولاردىڭ قاتارىندا:
• ۇلتتىق ات سپورتى كەشەنى (يپپودروم),
• 12 مىڭ ورىندىق EURO-IV ساناتىنداعى فۋتبول ستاديونى،
• كوپبەيىندى «Atyrau Arena» سپورت كەشەنى بار.
قازىرگى ۋاقىتتا وسى نىساندار بويىنشا جوبالاۋ جۇمىستارى اياقتالىپ، مەملەكەتتىك ساراپتامادان ءوتۋ كەزەڭى ءجۇرىپ جاتىر. قۇرىلىستى كەلەسى جىلى باستاۋ جوسپارلانعان.
جالپى العاندا، اتىراۋ وبلىسىندا حالىقتىڭ دەنە شىنىقتىرۋمەن جۇيەلى تۇردە شۇعىلدانۋ دەڭگەيى 45,1 پايىزدى قۇرايدى، جىل اياعىنا دەيىن كورسەتكىش 46 پايىزعا جەتەدى دەپ كۇتىلۋدە.
ۇقساس جاڭالىقتار
