اتىراۋدا اۆتوجول قىزمەتكەرلەرى كۇنى اتالىپ ءوتتى. كاسىبي مەرەكەگە وراي ۇيىمداستىرىلعان ءىس-شارادا وبلىس اكىمىنىڭ ورىنباسارى قايرات نۇرتاەۆ سالا ارداگەرلەرى مەن ماماندارىنا ءتۇرلى ماراپاتتار تابىستادى، دەپ حابارلايدى وڭىرلىك كوممۋنيكاتسيالار قىزمەتى.
«ەڭبەك ارداگەرى» مەدالىمەن ءتورت، «قۇرمەتتى جولشى» توسبەلگىسىمەن بەس، «قۇرمەتتى جۇرگىزۋشى» توسبەلگىسىمەن ءتورت، «ۇزدىك اۆتوكولىكشى» توسبەلگىسىمەن ءۇش ادام ماراپاتتالدى. ودان بولەك قر كولىك ءمينيسترىنىڭ «قۇرمەت گراموتاسى»، «العىس حاتى»، اتىراۋ وبلىسى اكىمىنىڭ العىس حاتى، قر كولىك مينيسترلىگىنىڭ اۆتوموبيل جولدارى كوميتەتى توراعاسىنىڭ «قۇرمەت گراموتاسى» جانە «العىس حاتىمەن»، وبلىستىق ءماسليحات توراعاسىنىڭ العىس حاتىمەن جالپى سانى ەلۋدەن استام ادام ماراپاتتالدى.
⁃ بىرلەسىپ اتقارعان جۇمىستارىڭىزدىڭ ارقاسىندا ايماقتا ۇلكەن جوبالار ىسكە اسىپ جاتىر. اتىراۋ-استراحان شەكاراسىنداعى وتكىزۋ بەكەتىندە جۇك كولىكتەرىنىڭ كەزەگى ماسەلەسىن شەشۋ ءۇشىن الداعى ۋاقىتتا جولاقتار سانى سەگىزگە دەيىن كوبەيتىلەدى. سونىمەن قاتار اتىراۋ-دوسسور جولىن ءبىرىنشى ساناتقا اۋىستىرۋ ءۇشىن قارجىلاندىرۋ جۇمىستارى ءجۇرىپ جاتىر. بارشاڭىزعا ەرەن ەڭبەك پەن ماڭداي تەرىڭىز ءۇشىن العىس ايتامىن. ارقاشان جولدارىڭىز اشىق بولسىن!- دەدى وبلىس اكىمىنىڭ ورىنباسارى قايرات نۇرتاەۆ.
قازىر اتىراۋ وڭىرىندەگى اۆتوموبيل جولدارىنىڭ جالپى ۇزىندىعى 6500 شاقىرىمعا جۋىقتايدى. بيىل ايماقتاعى 45 ەلدى مەكەندە 78 جوبا ىسكە اسىرىلادى. ولاردىڭ اياسىندا 230 شاقىرىمنان استام جول جوندەلىپ، جاقسى جانە قاناعاتتانارلىق جاعدايداعى جولداردىڭ ۇلەسىن 82 پايىزعا دەيىن ارتتىرۋ جوسپارلانۋدا.
وبلىستاعى جولاۋشىلار تاسىمالى جۇيەلى جولعا قويىلعان. قازىر 95 باعىتتا 12 مەكەمە قىزمەت كورسەتىپ، قالا مەن بارلىق اۋدان اراسىندا قاتىناس قامتاماسىز ەتىلگەن. بيىل جاڭا اۆتوپارك اشىلىپ، 90 زاماناۋي اۆتوبۋس ساتىپ الىندى، ولاردىڭ 48-ءى قازان ايىندا ىسكە قوسىلدى. سونىمەن قاتار «اشىق اسپان» رەجيمى ەنگىزىلىپ، حالىقارالىق اۋەجاي مەن 9 تەمىرجول ۆوكزالى جاڭعىرتىلۋدا. بۇل جۇمىستارلى جىل سوڭىنا دەيىن اياقتاۋ جوسپارلانىپ وتىر.
ۇقساس جاڭالىقتار
