ءماجىلىس دەپۋتاتى ەرمۇرات باپي «قازپوشتا» جۇمىسىن سىنعا الدى. ول مادەنيەت جانە اقپارات ءمينيسترى ايدا بالاەۆا مەن «قازپوشتا» اكتسيونەرلىك قوعامىنىڭ باسقارما توراعاسى بەكەجان جاكەەۆكە جولداعان دەپۋتاتتىق ساۋالىندا مەرزىمدى ءباسپاسوز قۇرالدارىن تاسىمالداۋ تاريفتەرىنىڭ قىمباتتاعانىن اتاپ ءوتتى، دەپ حابارلايدى «ادىرنا» ءتىلشىسى.
ايتۋىنشا، سوڭعى ۋاقىتتا «قازپوشتا» تاراپىنان مەرزىمدى باسىلىمدارعا كورسەتىلەتىن قىزمەتتەردىڭ اقىسى بىرنەشە ەسەگە ءوسىپ، وڭىرلىك جانە اۋداندىق گازەتتەردىڭ قارجىلىق جاعدايىنا اۋىر تيگەن.
«بيىلعى جىلدىڭ شىلدە ايىندا پوشتا ارقىلى مەرزىمدى باسىلىمداردى تاراتۋ قىزمەتىنىڭ اقىسى 1000 پايىزعا دەيىن ارتقان بولاتىن. بۇل وزگەرىس ءباسپاسوز ۇجىمدارى ءۇشىن اۋىر سوققى بولىپ، وڭىرلىك جانە اۋداندىق گازەتتەردىڭ قارجىلىق جاعدايىنا اسەر ەتتى. ال جۋىردا باسپاسوزگە جازىلۋ قىزمەتى ءۇشىن بۇرىنعى 17 پايىزدىق مولشەرلەمە 41,76 پايىزعا دەيىن كوتەرىلگەنى جونىندە حابارلاما الدىق. بۇل شەشىم دە رەداكتسيالار مەن جۋرناليستەر قاۋىمى ءۇشىن كۇتپەگەن جانە اۋىر سوققى بولىپ وتىر»،—دەدى ول.
ەرمۇرات باپي بۇل جاعدايعا قاتىستى مينيسترلىك پەن «قازپوشتادان» تۇسىنىكتەمە بەرۋدى تالاپ ەتتى.
«سىزگە تومەندەگى سۇراقتارىمىزدى جولدايمىز:
1. اقپارات قۇرالدارىمەن جاسالاتىن كەلىسىمشارتتار نەگە تەك ءبىر تاراپتىڭ – «قازپوشتانىڭ» مۇددەسىن قورعايدى؟
2. قىزمەت اقىسىنىڭ كوتەرىلۋى تۋرالى شەشىم نەگە الدىن الا ەسكەرتىلمەيدى جانە باق وكىلدەرىمەن تالقىلانبايدى؟
3. كوپتەگەن وڭىرلەردە مەرزىمدى باسىلىمدار وقىرماننىڭ قولىنا ۋاقىتىلى جەتپەي جاتادى. بۇل ءۇشىن مينيسترلىك تاراپىنان «قازپوشتا» كومپانياسىنىڭ جاۋاپكەرشىلىگىن ارتتىرۋ ماقساتىندا نەگە تالاپتار قويىلمايدى؟
4. سالالىق مينيسترلىكتىڭ ەسىنە سالايىق: رەداكتسيالار جازىلۋدان تۇسكەن قاراجاتتى بىردەن الۋ مۇمكىندىگىنەن ايىرىلعان. اقشا توقسان سايىن ءبولىپ بەرىلەدى. وسى قاراجات «قازپوشتانىڭ» ەسەپشوتىندا جاتقان كەزەڭدە كىمنىڭ مۇددەسىنە قىزمەت ەتەدى؟
بۇل ساۋالدار – ءبىر عانا باسىلىمنىڭ ەمەس، بۇكىل رەسپۋبليكالىق جانە وڭىرلىك قاعاز ۇلگىسىندەگى گازەتتەر شىعاراتىن بۇقارالىق اقپارات قۇرالدارىنىڭ ورتاق ماسەلەسى. سوندىقتان كوتەرىلگەن ماسەلەلەرگە تۇسىنىكتەمە بەرىپ، جاريا تۇردە جاۋاپ بەرۋىڭىزدى سۇرايمىز»،—دەپ تولىقتىردى دەپۋتات.
