الماتى وبلىسىنىڭ اكىمى مارات سۇلتانعازيەۆ ورتالىق كوممۋنيكاتسيالار قىزمەتىندەگى بريفينگتە وڭىردە ءبىلىم، سپورت جانە كرەاتيۆتى يندۋستريانى دامىتۋ باعىتىنداعى باستامالاردى تانىستىردى.
اكىمنىڭ ايتۋىنشا، جاستاردىڭ شىعارماشىلىق الەۋەتىن كوتەرۋ ماقساتىندا وبلىستا نيۋ-يورك كينواكادەمياسىنىڭ فيليالى اشىلعان. بۇل – ءوڭىر ءۇشىن ماڭىزدى مادەني جانە ءبىلىم بەرۋ قادامى. اكادەميا 200 ستۋدەنتكە ارنالعان، وقۋ امەريكالىق باعدارلاما بويىنشا بەس باعىتتا جۇرگىزىلەدى: كينووندىرىس، ستسەناري جانە اكتەرلىك شەبەرلىك، ويىن ديزاينى، 3D-انيماتسيا. قازىر اكادەميادا 60 ستۋدەنت ءبىلىم الىپ جاتىر، ولاردىڭ اراسىندا افريكا جانە ەۋروپا ەلدەرىنەن كەلگەندەر دە بار.
سونىمەن قاتار حالىقارالىق دەڭگەيدە سپورتشىلار دايىنداۋعا باعىتتالعان «اتلەتيكو مادريد» فۋتبول اكادەمياسى جۇمىسىن باستاعان. بۇگىندە مۇندا قازاقستاننىڭ تۇكپىر-تۇكپىرىنەن كەلگەن 113 وقۋشى ءبىلىم الىپ ءجۇر.
وبلىستىڭ مادەني جانە رۋحاني ومىرىندە ەرەكشە ورىن الاتىن شارالار قاتارىندا نۇرعيسا تىلەنديەۆتىڭ 100 جىلدىق مەرەيتويى بار. «وتىرار سازى» وركەسترىنىڭ نەگىزىن قالاۋشى، ايگىلى كومپوزيتور، ديريجەر، قازاقستاننىڭ حالىق ءارتىسىنىڭ مەرەيتويى يۋنەسكو دەڭگەيىندە اتالىپ ءوتىلىپ جاتىر. مەرەيتوي اياسىندا تۇركسوي ۇيىمىمەن بىرلەسكەن جوبالار جۇزەگە اسىرىپ، بەيجىڭ مەن ماسكەۋدە كونتسەرتتەر ۇيىمداستىرىلعان. سونداي-اق نۇرعيسا تىلەنديەۆتىڭ ەسىمى مادەنيەت ۇيلەرىنە، كوشەلەرگە جانە وقۋ ورىندارىنا بەرىلىپ جاتىر.
