تۇركىستان وبلىسىندا اكەسىن ۇرىپ-سوعىپ، قورلاعان ەر ادامنىڭ ىسىنە قاتىستى قىلمىستىق تەرگەۋ ءجۇرىپ جاتىر، دەپ حابارلايدى “ادىرنا” ۇلتتىق پورتالى قازاقپاراتقا سىلتەپ.
الەۋمەتتىك جەلىدە اكەسىن بالاعاتتاپ، ۇرعان ازاماتتىڭ ارەكەتى قوعامدا ۇلكەن رەزونانس تۋدىرعان ەدى. كەيىن ىسكە كەلىنىڭ دە قاتىسى بولۋى مۇمكىن دەگەن اقپارات تارادى.
ال ۇلىنان قورلىق كورگەن قاريا قايتىس بولدى.
تۇركىستان وبلىسى پوليتسيا دەپارتامەنتىنىڭ مالىمەتىنشە، اتالعان جاعدايعا بايلانىستى قىلمىستىق ءىس قوزعالعان. ال وبلىستىق دەنساۋلىق ساقتاۋ باسقارماسى قوسسەيىت اۋىلىنىڭ تۇرعىنى، 1947 جىلى تۋعان تۇرعىننىڭ 2025 جىلدىڭ 2-نەن 3-ءشى قىركۇيەگىنە قاراعان ءتۇنى كوز جۇمعانىن حابارلادى.
“تۋىستارى دەر كەزىندە حابارلاماعاندىقتان، مەديتسينالىق قىزمەتكەرلەر قايتىس بولۋ تۋرالى انىقتاما بەرە الماعان. قازىرگى تاڭدا مايىتكە ەكسگۋماتسيا جاسالىپ، سوت-مەديتسينالىق ساراپتاما جۇرگىزىلۋدە. قورىتىندىسى شىققان سوڭ قوسىمشا مالىمەت بەرىلەدى”، – دەلىنگەن باسقارما ۇسىنعان اقپاراتتا.
دارىگەرلەردىڭ ايتۋىنشا، مارقۇم ءتىرى كەزىندە «I11» جانە «M42» دياگنوزىمەن ديناميكالىق باقىلاۋدا بولعان. دەنە جاراقاتتارى بويىنشا مەديتسينالىق كومەككە جۇگىنبەگەن ءارى شاعىم تۇسىرمەگەن.
