الماتىدا حوستەلدەگى ورتتەن قازا تاپقاندار تىزىمىندە تۇرعان ازامات ءتىرى بولىپ شىقتى، دەپ حابارلايدى "ادىرنا" ءتىلشىسى otyrar.kz-كە سىلتەپ.
30 قاراشا كۇنى الماتىداعى حوستەلدەردىڭ بىرىنەن ءورت شىعىپ، 13 ادام قايتىس بولدى دەگەن اقپارات تاراعان بولاتىن. الايدا "قايتىس بولعاندار" تىزىمىندە تۇرعان تۇركىستان وبلىسىنىڭ تۋماسى ءتىرى بولىپ شىقتى.
بۇل اقپاراتتى سارىاعاش اۋدانى دەربىسەك اۋىلى اكىمىنىڭ ورىنباسارى حابارلاعان.
ازاماتتىڭ اتى-ءجونى - ءامىرالى رامازان ءباتىرالىۇلى. 20 جاستاعى تۇركىستاندىق ازامات شىمكەنتتەگى مەدرەسەلەردىڭ بىرىندە وقيتىن بولىپ شىقتى. ول اقشا تابۋ ماقساتىندا الماتىعا كەلگەن ەكەن.
قايعىلى وقيعادان بىرنەشە كۇن بۇرىن رامازان ءباتىرالىۇلى ۇيىنە، سارىاعاش اۋدانىنا ورالادى.
ال اتا-اناسى پەرزەنتىن تاشكەنتتە مەديتسينالىق تەكسەرۋدەن ءوتۋ ءۇشىن شاقىرىپ العان. قازىر 20 جاستاعى جىگىت اتا-اناسىنىڭ جانىندا.
ەسكە سالا كەتەيىك، 30 قاراشا كۇنى الماتىدا حوستەلدەردىڭ بىرىندە ءورت شىعىپ، 13 ادامنىڭ ءومىرىن جالماعان بولاتىن.
