فوتو: اشىق دەرەككوز
شىمكەنتتە وتكەن كونتسەرت كەزىندە 18 جاستاعى قىزدىڭ جاراقات الۋىنا بايلانىستى ءانشى قايرات نۇرتاستىڭ الداعى كونتسەرتتەرىنە بيلەتتەردى ساتۋ ۋاقىتشا توقتاتىلدى. بۇل تۋرالى Freedom Ticketon بيلەت ساتۋ سەرۆيسى مالىمدەدى، دەپ حابارلايدى "ادىرنا".
كومپانيانىڭ حابارلاۋىنشا، ساتىلىم قايتا باستالاتىن ۋاقىت ازىرگە بەلگىسىز. قوسىمشا اقپارات رەسمي پاراقشالاردا جاريالانباق.
«شىمكەنتتەگى جاعدايعا بايلانىستى قايرات نۇرتاستىڭ كونتسەرتتەرىنە بيلەت ساتىلىمى ۋاقىتشا توقتاتىلدى. رەسمي پاراقشامىزدى وقىپ ءجۇرىڭىز، قوسىمشا حابارلايمىز»، – دەلىنگەن Ticketon حابارلاماسىندا.
ەسكە سالا كەتەيىك، 10 قازاندا شىمكەنتتەگى قاجىمۇقان مۇڭايتپاسۇلى اتىنداعى ستاديوندا وتكەن قايرات نۇرتاستىڭ كونتسەرتى كەزىندە سەگىز ادام مەديتسينالىق كومەككە جۇگىنگەن. ولاردىڭ جەتەۋى دارىگەرلەردىڭ تەكسەرۋىنەن كەيىن ۇيلەرىنە جىبەرىلدى. ال 18 جاستاعى جاراقات العان قىز اۋرۋحاناعا جەتكىزىلگەن بولاتىن.
وسى وقيعادان كەيىن پوليتسيا قاۋىپسىزدىك تالاپتارىنا ساي كەلمەيتىن قىزمەت كورسەتۋ فاكتىسى بويىنشا قىلمىستىق ءىس قوزعادى. قازىر وقيعانىڭ ءمان-جايى انىقتالىپ جاتىر.
