بەلگىلى كومپوزيتور، اقىن جانە ءانشى ەركەش شاكەەۆ 31 مامىر كۇنى Almaty Theatre ساحناسىندا وتەدى دەپ جوسپارلانعان ساياسي قۋعىن-سۇرگىن مەن اشارشىلىق قۇرباندارىن ەسكە الۋعا ارنالعان “الاش” كونتسەرتىنىڭ بولمايتىنىن حابارلادى. بۇل تۋرالى ول Facebook پاراقشاسىندا مالىمدەدى، دەپ حابارلايدى “ادىرنا” ۇلتتىق پورتالى.
كونتسەرت ساياسي قۋعىن-سۇرگىن مەن اشارشىلىق قۇرباندارىن ەسكە الۋعا ارنالۋى ءتيىس ەدى. الايدا، شاكەەۆتىڭ ايتۋىنشا، بىرقاتار كەدەرگىلەرگە بايلانىستى شارا وتكىزىلمەيتىن بولدى. ول جاعدايدىڭ ءمان-جايىن ءۇش نەگىزگى سەبەپپەن ءتۇسىندىردى.
“سىزدەرگە زور وكىنىشپەن كەلەسىنى حابارلايمىن: ساياسي قۋعىن-سۇرگىن مەن اشارشىلىق قۇرباندارىن ەسكە الۋعا ارنالعان كونتسەرت بولمايدى!
قازىرگى ۋاقىتتا تەك ءۇش سەبەپتى اتاپ وتە الامىن، بىراق ولاردىڭ ءوزى-اق جاعدايدىڭ استارىن تۇسىنۋگە جەتكىلىكتى دەگەن ويدامىن:
1. بۇگىن "FreedomTicketon" سايتى ەش ەسكەرتۋسىز بيلەت ساتۋدى توقتاتتى.
2. وتكەن اپتادا (1 مامىر كۇنى) "Almaty Theatre" قول قويىلعان كەلىسىمشارت پەن الدىنالا تولەنگەن جالعا الۋ اقىسىنا قاراماستان، مەنىڭ كونتسەرتىمدى اۋىزشا تۇردە توقتاتقان بولاتىن. رەسمي حاتتى كۇتىپ وتىرمىز.
3. سونداي-اق بۇگىن، كۇتپەگەن جەردەن (تەاتر، كونتسەرت وتكىزۋگە باس تارتقاننىنا بەس كۇن وتكەن سوڭ عانا) الماتى قالاسى مادەنيەت باسقارماسىنان، ۇيىمداستىرۋشىلار تاراپىنا شاعىم ايتىلدى”، دەدى سازگەر.
ەركەش شاكەەۆ بارلىق رەسمي جاۋاپتار مەن باس تارتۋ سەبەپتەرى جاريالانعان سوڭ، قوسىمشا اقپارات بەرەتىنىن ايتىپ ءوتتى. سونداي-اق ول بۇل كونتسەرت ارقىلى حالقىمىزدىڭ قاسىرەتتى تاريحىنا قۇرمەت بىلدىرگىسى كەلگەن كورەرمەندەردەن كەشىرىم سۇرادى.
