تۇركىستان قالاسىنىڭ اكىمى ازىمبەك پازىلبەكۇلىنىڭ توراعالىعىمەن قالا اۋماعىنداعى ينفراقۇرىلىمدىق دامۋ مەن كوگالداندىرۋ جۇمىستارى بويىنشا كەزەكتى جيىن ءوتتى.
جيىن بارىسىندا اتقارىلعان جۇمىستاردىڭ ەسەبى تىڭدالىپ، الداعى جوسپارلار پىسىقتالدى.
بيىل تۇركىستان قالاسى بويىنشا كوگالداندىرۋ جۇمىستارى 772 گەكتار اۋماقتى قامتىدى. ونىڭ ىشىندە 36 ساياباق، 80 سكۆەر مەن اللەيا، 168 كوشە جانە 16 جاسىل القاپ بار. قالا اۋماعىنداعى كوگال كولەمى – 345 گەكتاردى، گۇلدەر القابى – 8 گەكتاردى قۇرايدى. جوسپارعا سايكەس، جىل سوڭىنا دەيىن 238 مىڭنان استام اعاش پەن بۇتالاردى ەگۋ قاراستىرىلعان. كوكتەمگى ماۋسىمدا 80 375 ءتۇپ اعاش جانە 67 310 ءتۇپ بۇتا وتىرعىزىلسا، كۇزگى كەزەڭدە قوسىمشا 134 250 ءتۇپ اعاش پەن 129 350 ءتۇپ بۇتا ەگىلەدى. سونىمەن قاتار، 128 گەكتار اياقجول اۋماقتارىنا دا كوگالداندىرۋ جۇمىستارى جۇرگىزىلۋدە.
قالانىڭ نەگىزگى كوشەلەرى – اەروپورت تاس جولى، قىزىلوردا تاس جولى، ب.ساتتارحانوۆ داڭعىلى، جاڭا قالاداعى كوشەلەر مەن اۋلالاردا ءارتۇرلى اعاش تۇرلەرى وتىرعىزىلسا، ساياباق ايماقتارىنا 53 مىڭنان استام گۇلدەر مەن ماۋسىمدىق وسىمدىكتەر ەگۋ جوسپارلانعان.
نەگىزگى جۇمىستار قاتارىندا اعاشتار مەن بۇتالاردى وتىرعىزۋمەن بىرگە، گۇلزارلاردى اباتتاندىرۋ جانە «لاۆاندا القابى» سياقتى ارنايى جوبالاردى جۇزەگە اسىرۋ بار. اەروپورت جولى مەن ب.ساتتارحانوۆ داڭعىلى قيىلىسىندا ورنالاساتىن «لاۆاندا القابىنىڭ» جالپى اۋماعى 21 791 شارشى مەتردى قۇراپ، وندا 65 مىڭنان استام لاۆاندا گۇلدەرى وتىرعىزىلماق.
جالپى بيىل كۇزگى ماۋسىمىندا 134 250 اعاش پەن 129 350 بۇتا وتىرعىزۋ قاراستىرىلعان. قالانىڭ 25 كوشەسى مەن 11 دەمالىس نىسانى اۋماعىندا اعاش وتىرعىزۋ جوسپارلانۋدا.
جيىن بارىسىندا قالا باسشىسى ازىمبەك پازىلبەكۇلى جاۋاپتى باسشىلارعا ەگىلگەن كوشەتتەردىڭ كۇتىمىن جۇيەلى ۇيىمداستىرۋدى، گۇلدەندىرۋ مەن اباتتاندىرۋ جۇمىستارىن ماۋسىمدىق كەستەگە ساي جۇرگىزۋدى قاتاڭ ەسكەرتتى.
ۇقساس جاڭالىقتار
