تۇركىستان قالاسىنىڭ جول-كولىك ينفراقۇرىلىمىن جاقسارتۋ ماقساتىندا جۇيەلى جۇمىستار جالعاسۋدا. قازىرگى تاڭدا قالا اۋماعىندا 845 شاقىرىم جول مەن 875 كوشە بار. 2024 جىلدىڭ قورىتىندىسى بويىنشا جولداردىڭ 50,3 پايىزى جاقسى جانە قاناعاتتانارلىق جاعدايدا.
بۇل تۋرالى قالا اكىمى ازىمبەك پازىلبەكۇلىنىڭ ارالاۋ بارىسىندا جولاۋشىلار كولىگى جانە اۆتوكولىك جولدارى ءبولىمىنىڭ باسشىسى ارمان وسپان باياندادى.
بيىل قوسىمشا 138,5 شاقىرىم جولدى جوندەۋ جوسپارلانىپ وتىر. بۇل جۇمىستار تولىق ورىندالعان جاعدايدا، جاقسى جاعدايداعى جولداردىڭ ۇلەسى 66,7 پايىزعا جەتەدى دەپ كۇتىلۋدە.
قالاداعى نەگىزگى كوشە جەلىلەرىنىڭ ءبىرى – تاۋكە حان داڭعىلى. ونىڭ جالپى ۇزىندىعى 5,16 شاقىرىمدى قۇرايدى. قازىرگى تاڭدا داڭعىلدا جول جوندەۋ جۇمىستارى قارقىندى جۇرگىزىلۋدە. بۇگىنگى كۇنى 2,3 شاقىرىم بولىگىنە جاڭا اسفالت جابىندىسى توسەلىپ، جوندەۋ تولىق اياقتالدى. جولدىڭ ەسكى قاباتى ارنايى تەحنيكامەن قىرىلىپ، ورنىنا ءىرى جانە ۇساق تۇيىرشىكتى جاڭا اسفالت سالىنۋدا.
سونىمەن قاتار، جول قاۋىپسىزدىگىن ارتتىرۋ ماقساتىندا داڭعىل بويىنداعى جول بەلگىلەرى جاڭارتىلىپ، قيىلىستار مەن كىرمە جولدارعا دا جوندەۋ جۇمىستارى جۇرگىزىلۋدە.
بارلىق قۇرىلىس جانە جوندەۋ جۇمىستارى 45 كۇن ىشىندە تولىق اياقتالادى دەپ جوسپارلانىپ وتىر.
ۇقساس جاڭالىقتار
