قاراعاندى وبلىسىندا كامەلەتكە تولماعان قىزعا قاتىستى قىلمىستىق ءىس بويىنشا سوت ۇكىمى شىقتى. ەر ادام 17 جىلعا باس بوستاندىعىنان ايىرىلدى، ال پروكۋراتۋراعا وقيعاعا جول بەرگەن ەرەسەكتەردىڭ ارەكەتىن زاڭ تۇرعىسىنان تەكسەرۋ تاپسىرىلدى, دە حابارلايدى «ادىرنا».
قاراعاندىدا 15 جاستاعى قىزدىڭ اناسى مەن وگەي اكەسى وتباسىلىق تانىستارىنا قىزدى تۇرمىسقا بەرگەن. ناۋرىز ايىندا ەر ادام بالانى جالدامالى پاتەرگە اپارىپ، بىرنەشە رەت زورلاعان. قىز پاتەردەن قاشىپ شىعىپ، تۋعان اكەسىنەن كومەك سۇراعان.
قاراعاندى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق ءىستى قاراۋ اياقتالدى. كامەلەتكە تولماعان بالاعا قاتىستى قىلمىس جاسادى دەپ ايىپتالعان 37 جاستاعى ەر ادام سوت الدىندا جاۋاپ بەردى.
پروكۋرور ايىپتالۋشىعا ەڭ جوعارعى جازا – 17 جىلعا باس بوستاندىعىنان ايىرۋدى سۇرادى. الايدا قورعاۋشى جازانى جەڭىلدەتۋدى سۇرادى.
ءىس ماتەريالدارىمەن تانىسقان سوت سوتتالۋشىنىڭ كىنالى دەن تاۋىپ، وعان 17 جىلعا باس بوستاندىعىنان ايىرۋ جازاسىن تاعايىندادى. سونداي-اق وعان مۇعالىم بولىپ جۇمىس ىستەۋگە نەمەسە كامەلەتكە تولماعاندار قاتىساتىن لاۋازىمداردى اتقارۋعا ءبىرجولا تىيىم سالىندى.
“سوتتالۋشىنىڭ كىناسى جابىرلەنۋشىنىڭ، ونىڭ زاڭدى وكىلىنىڭ، كۋالاردىڭ بەرگەن جاۋاپتارى، ساراپتاما قورىتىندىسى، قىلمىستىق ءىس بويىنشا باسقا دا ماتەريالدار ارقىلى دالەلدەندى. جەڭىلدەتەتىن ءمان-جايلار جوق”، – دەلىنگەن سوت حابارلاماسىندا.
سونىمەن قاتار، سوت پروكۋراتۋراعا جابىرلەنۋشىنىڭ اناسى مەن وگەي اكەسىنىڭ ارەكەتتەرىن ىقتيمال زاڭ بۇزۋشىلىقتار بويىنشا تەكسەرۋدى تالاپ ەتىپ، حات جولدادى.
ۇكىم ءالى زاڭدى كۇشىنە ەنگەن جوق.
