الماتىداعى Artmeken Gallery زاماناۋي ونەر گالەرەياسىندا اسەل كەنجەتاەۆا مەن ءمۇسىنشى سانجار دوسماعامبەتوۆتىڭ «قاۋىپتى بايلانىستار» اتتى كورمەسى ءوتتى، دەپ حابارلايدى «ادىرنا» ۇلتتىق پورتالى InformBuro سايتىنا سىلتەمە جاساپ.
كورمەنىڭ باستى تاقىرىبى – تۇرمىستىق زورلىق-زومبىلىق ماسەلەلەرى مەن قازىرگى قازاق قوعامىنداعى ايەلدىڭ بەينەسى. ەكسپوزيتسيا اۆتورلارى اسەل مەن سانجار – ەرلى-زايىپتى.
«كورمە اتىشۋلى كىسى ولىمىمەن بايلانىستى دەپ ويلاماڭىزدار، قازان ايىندا ءبارىن ويلاستىرىپ قويعانبىز. الايدا كورمەنىڭ تەڭسىزدىكپەن، قازاقستاندىقتار باستان كەشەتىن زورلىق-زومبىلىقپەن بايلانىستى ەكەنى راس. ۇكىمەتتىك ەمەس ۇيىمداردىڭ باعالاۋىنشا، ەلىمىزدە جىل سايىن 400 ايەل جۇبايىنىڭ زورلىق-زومبىلىعىنان كوز جۇمادى. اسەلدىڭ جۇمىستارىن سىزدەر كورگەنسىزدەر، الايدا قازىرگى كۇنى وزەكتى بولىپ وتىرعان سوڭ قايتالاۋدى ءجون كوردىك. بۇل – ءداستۇر مەن قازىرگى زامان اراسىندا اجەلەرى مەن اتالارى سياقتى ءومىر سۇرە المايتىن ايەلدەر تۋرالى»، – دەيدى كورمەنىڭ كۋراتورى، ونەرتانۋشى ۆالەريا يبراەۆا.
سۋرەتتەگى ايەلدەردىڭ تاققان اشەكەيلەرى قانشالىقتى ادەمى بولسا دا، ايەلدىڭ ءۇنىن شىعارماي، تۇنشىقتىراتىنىن، ارقالاعان جاساۋلارى قانشالىقتى قىمبات بولسا دا، ايەلدى كىسەندەپ، ونىڭ يىعىنا ارتىلعان اۋىر جۇكتى بەينەلەيدى دەپ ويىن جەتكىزەدى ونەرتانۋشى.
سانجار دوسماعامبەتوۆتىڭ «7ۋياتOFF» دەپ اتالاتىن جۇمىستارىندا زورلىق-زومبىلىق تاقىرىبى انىق كورىنەدى. مۇسىندەردىڭ دەنەسى ارقانعا بايلانىپ تۇر. اۆتوردىڭ ايتۋىنشا، مۇسىندەر جوباسى ءۇش جىل بويى جالعاسىپ كەلەدى. الدىمەن پىشىندەر قۇراستىرىلعان، كەيىن سكانەردەن وتكىزىلىپ، كومپيۋتەر ارقىلى وڭدەلىپ، كەيىن بارىپ باسۋعا جىبەرىلگەن. ەڭ قيىنى – سوڭعى كەزەڭ، ويتكەنى قازاقستاندا 3D-پرينتەردە ءمۇسىن جاساپ كورگەن ادام جوق، سانجاردىڭ توبى بۇل تۇرعىدا ءبىرىنشى بولىپ كوش باستاعان.
«العاشقى ءمۇسىن قۇداي بولدى. ول ادامدى توپىراقتان جاراتتى. سوندىقتان مەن جۇمىس ىستەپ جاتقاندا ونىڭ بار ەكەنىن سەزىنەمىن. جاساپ جاتقاندا اناتوميا مەن پلاستيكا تۋرالى ويلامايسىڭ، الايدا جۇمىس بىتكەن سوڭ سەن ءۇشىن بىرەۋ وسىنداي تاماشا تۋىندى جاساپ شىققانىن تۇسىنەسىڭ»، – دەيدى سانجار.
«ماحاببات دەگەن نە؟ ماحاببات دەگەن – قۇدايدىڭ ءوزى! پىشىندەر ماحابباتپەن جاسالعان، سوندىقتان دا ايەل مەن جاھاننىڭ سۇلۋلىعى الەمدى قۇتقاراتىنىنا سەنەمىن»، – دەيدى ساۋلەتشى.
ونەرتانۋشى ۆالەريانىڭ ايتۋىنشا، مۇسىندەر ارقاننان بوساپ، ەركىندىككە شىققىسى كەلىپ بۇلقىنىپ تۇرعان ءتارىزدى.
«كورمە شەشىم بەرمەيدى، الايدا ول ەلىمىزدەگى ايەلدىڭ ورنىنا نازار اۋدارتادى. زورلىق-زومبىلىق، قىسىم، تەڭسىزدىك – باق پەن الەۋمەتتىك جەلى بەتتەرىندە كوپ كوتەرىلەتىن تاقىرىپتار. اسىرەسە، قازاقستاندا بولعان سوڭعى جايتتاردان كەيىن»، – دەيدى كورمە كۋراتورى ۆالەريا يبراەۆا.
ال سانجاردىڭ سوزىنشە، ايەلگە دەگەن قارىم-قاتىناس – قوعامنىڭ دەڭگەيىن كورسەتەدى.
«ادىرنا» ۇلتتىق پورتالى
