گازانىڭ شىعىسىنداعى شۋدجايادا يزرايل درونىنىڭ شابۋىلىنان التى پالەستينالىق قازا تاپتى، دەپ حابارلايدى "ادىرنا" ۇلتتىق پورتالى.
WAFA اگەنتتىگىنىڭ مالىمەتىنشە، ۇيلەرىن تەكسەرۋگە شىققان بەيبىت تۇرعىندارعا درون شابۋىلى جاسالعان. سالدارىنان بەس ادام كوز جۇمىپ، تاعى بىرنەشە ادام جاراقات العان.
سونداي-اق، حان-يۋنيس قالاسىنىڭ شىعىسىندا ءبىر ادام قازا تاۋىپ، ءبىر ادام جارالانعان. حالاۋا بوسقىندار لاگەرىندە دە بىرنەشە تۇرعىن جاراقات العانى ايتىلدى.
يزرايل قورعانىس كۇشتەرى درون شابۋىلى بولعانىن راستادى.
اسكەريلەردىڭ ايتۋىنشا، ادامدار يزرايل اسكەرى ورنالاسقان بەكەتتەرگە جاقىنداپ، “سارى سىزىقتان” ءوتىپ كەتكەن. وسىدان كەيىن الدىمەن ەسكەرتۋ جاسالىپ، قوزعالىس جالعاسقان سوڭ اۆياتسيالىق سوققى بەرىلگەن.
“تساحال گازاداعى تۇرعىنداردى نۇسقاۋلاردى ورىنداۋعا جانە يزرايل كۇشتەرى ورنالاسقان ايماقتارعا جاقىنداماۋعا شاقىرادى”، — دەلىنگەن يزرايل ارمياسىنىڭ رەسمي مالىمدەمەسىندە.
ايتا كەتەيىك، يزرايل مەن حاماس اراسىنداعى اتىستى توقتاتۋ رەجيمى 10 قازان كۇنى ساعات 12:00-دە كۇشىنە ەنگەن ەدى.
بۇعان دەيىن مىسىردىڭ شارم-ەل-شەيح قالاسىندا وتكەن بەيبىتشىلىك سامميتىندە اقش، تۇركيا، قاتار جانە مىسىر باسشىلارى گازا سەكتورى بويىنشا اتىس توقتاتۋ كەلىسىمىنە قول قويعان.
