قازاقستانعا مۇناي تاسىمالدايتىن بالامالى باعىتتار قاجەت. بۇل تۋرالى ساياسي ساراپشى اسقار جاپاروۆ Report اگەنتتىگىنە بەرگەن سۇقباتىندا ايتتى، دەپ حابارلايدى «ادىرنا» ءتىلشىسى.
ول مۇناي ەكسپورتىنىڭ بالامالى باعىتتارى باكۋ-تبيليسي-دجەيحان (بتد) مۇناي قۇبىرى مەن ترانسكاسپيلىك لوگيستيكالىق تىزبەكتەر، كاسپي قۇبىرى كونسورتسيۋمى ءۇشىن ستراتەگيالىق ساقتاندىرۋ ەكەندىگىن مالىمدەدى.
ايتۋىنشا، ماسەلە بالامالى باعىتتى ءبىر رەت قانا قولدانۋ ەمەس، كقك ينفراقۇرىلىمىنا جاسالعان شابۋىلدار جاعدايىندا مۇناي ەكسپورتىنىڭ تۇراقتىلىعىن جۇيەلى تۇردە ارتتىرۋدا بولىپ وتىر. ساراپشى قازاقستان ءۇشىن مۇناي ەكسپورتىنىڭ بالامالى باعىتتارىن قالىپتاستىرۋدا نەگىزگى ءرولدى ازەربايجان اتقاراتىنىن اتاپ ءوتتى.
«باكۋ ءىس جۇزىندە بالامالى جەتكىزۋ جۇيەسىنىڭ نەگىزگى تورابىنا اينالعان، سەبەبى ونىڭ اۋماعى ارقىلى سەنىمدى، ساياسي تۇرعىدان بولجامدى جانە تەحنولوگيالىق تۇرعىدان تاجىريبەدەن وتكەن مارشرۋت (بتد مۇناي قۇبىرى) وتەدى. بۇل ەلدىڭ قازاقستانمەن دە، باتىستىق ەنەرگەتيكالىق كومپانيالارمەن دە تۇراقتى سەرىكتەستىك قاتىناستارى بار. وسى فاكتور بۇل ازەربايجان باعىتىن تەك تەوريالىق ەمەس، ناقتى پراكتيكالىق بالاماعا اينالدىرادى»،-دەدى جاپاروۆ.
ول مۇنداي باعىتتاردىڭ ارقاسىندا قازاقستان ءبىر عانا ەكسپورتتىق باعىتقا تاۋەلدى بولمايتىنىن اتاپ ءوتتى.
«جۇمىس ىستەيتىن بالامانىڭ بولۋى تەڭگەرىمدى وزگەرتەدى. بۇل نارىققا قازاقستان مۇنايىن ەكسپورتتاۋ تەك ءبىر باعىتقا نەمەسە ءبىر ساياسي فاكتورعا تاۋەلدى ەمەس دەگەن سيگنال بەرەدى»،- دەپ ءتۇسىندىردى ساراپشى.
ايتۋىنشا، بالامالى باعىتتار بۇگىنگى كۇنى كقك-نى تولىق الماستىرماي، تەك تولىقتىرادى.
«كولەمدەرگە شەكتەۋ، كاسپيدەگى فلوتقا قوسىمشا ينۆەستيتسيالاۋ قاجەتتىلىگى، پورت قۋاتتارىن كەڭەيتۋ جانە تاريفتەردى كەلىسۋ ۋاقىت پەن ۇيلەستىرۋدى تالاپ ەتەدى. دەگەنمەن، ستراتەگيالىق باعىت ايقىندالعان. ازەربايجان ارقىلى ترانسكاسپيلىك مارشرۋتتى كەڭەيتۋ — داعدارىسقا قىسقا مەرزىمدى رەاكتسيا ەمەس، قازاقستاننىڭ ەكسپورت ساياساتىن ديۆەرسيفيكاتسيالاۋ جانە ەنەرگەتيكالىق قاۋىپسىزدىككە باعىتتالعان ۇزاق مەرزىمدى كۋرس»، — دەدى ساياسي ساراپشى.
بۇعان دەيىن ەنەرگەتيكا مينيسترلىگى قارا تەڭىز اكۆاتورياسىندا قازاقستاننىڭ ەكسپورتتىق مۇنايىن تاسىمالداعان ەكى تانكەرگە شابۋىل جاسالعانىن ايتقان ەدى.
