«قازمۇنايگاز» ۇلتتىق كومپانياسى ماڭعىستاۋ وبلىسىنداعى «سولتۇستىك وزەن» ۋچاسكەسىندە مۇناي ىزدەۋ جۇمىستارىن باستادى، دەپ حابارلايدى "ادىرنا" ۇلتتىق پورتالى.
كومپانيا بۇل ۋچاسكەنى بارلاۋ جانە يگەرۋ قۇقىعىن 2024 جىلدىڭ ماۋسىم ايىندا العان بولاتىن.
قازىرگى ۋاقىتتا اۋماقتا العاشقى ىزدەۋ ۇڭعىماسى بۇرعىلانۋدا. بارلىعى ەكى ۇڭعىما قازۋ جوسپارلانعان.
ونىڭ ءبىرى 2000 مەتر بولسا، ەكىنشىسى — 1650 مەتر تەرەڭدىكتە. جوبانى «قازمۇنايگازدىڭ» ەنشىلەس كومپانياسى — «KMG Barlau» جشس جۇزەگە اسىرۋدا.
بۇرعىلاۋ جۇمىستارى باستالماس بۇرىن 400 شارشى شاقىرىم اۋماقتا سەيسموبارلاۋ زەرتتەۋلەرى جۇرگىزىلگەن.
ء«بىرىنشى ىزدەۋ ۇڭعىماسى — جوبانىڭ نەگىزگى كەزەڭدەرىنىڭ ءبىرى. ونىڭ ناتيجەلەرى گەولوگيالىق قۇرىلىمدى ناقتىلاپ، ايماقتىڭ مۇناي-گاز الەۋەتىن انىقتاۋعا مۇمكىندىك بەرەدى»، — دەپ مالىمدەدى كومپانيا وكىلدەرى.
«وزەن سولتۇستىك» ۋچاسكەسى قاراقيا جانە ماڭعىستاۋ اۋداندارىنىڭ اۋماعىندا، جاڭاوزەن قالاسىنان شامامەن 20 شاقىرىم جەردە ورنالاسقان. بۇل جوبا كۇردەلى دەپ سانالادى جانە وعان ەرەكشە نازار اۋدارىلىپ وتىر. سەبەبى بۇل جۇمىستار پرەزيدەنت قاسىم-جومارت توقاەۆتىڭ تاپسىرماسى اياسىندا جۇزەگە اسۋدا. مەملەكەت باسشىسى اقتاۋعا جۇمىس ساپارى كەزىندە ۇلتتىق كومپانياعا ءوڭىردىڭ مۇناي-گاز الەۋەتىن ودان ءارى دامىتۋ مىندەتىن جۇكتەگەن بولاتىن.
