اقمولا وبلىسى، بۇلاندى اۋدانىنىڭ نوۆوبراتسكوە اۋىلى ماڭىنداعى قوڭىر وزەنىنىڭ جاعاسىنان شامامەن 35–40 مىڭ جىل بۇرىن ءومىر سۇرگەن تۇكتى مامونتتىڭ تومەنگى جاق سۇيەگى مەن جىلىك سۇيەكتەرى تابىلدى.
بۇل تۋرالى قازاقستان رەسپۋبليكاسىنىڭ ۇلتتىق مۋزەيى حابارلادى.
عالىمداردىڭ ايتۋىنشا، تابىلعان مامونتتىڭ جاسى شامامەن 40–50 جاس بولعان. قۇندى ولجانى «سپح نوۆوبراتسكوە» اگروحولدينگىنىڭ قىزمەتكەرلەرى — ادىلەت وماروۆ پەن ءالجان راكيشەۆ تاپقان. ولار بۇل جونىندە بىردەن ۇلتتىق مۋزەي ماماندارىنا حابارلاعان. قازىر سيرەك كەزدەسەتىن بۇل جادىگەر مۋزەي قورىندا ارنايى جاعدايدا ساقتالۋدا.
مامانداردىڭ پىكىرىنشە، تومەنگى جاق پەن جىلىك سۇيەكتەرىنىڭ ءبۇتىن كۇيىندە ساقتالۋى — مامونتتىڭ تولىق قاڭقاسى وسى اۋماقتا بولۋى مۇمكىن ەكەنىن اڭعارتادى. وسىعان بايلانىستى ۇلتتىق مۋزەي جانىنان قۇرىلعان ارنايى عىلىمي توپ الداعى ۋاقىتتا جۇيەلى تۇردە ارحەولوگيالىق قازبا جۇمىستارىن جۇرگىزۋدى جوسپارلاپ وتىر.
ۇلتتىق مۋزەي وكىلدەرى بۇل ەرەكشە تاريحي-عىلىمي جاڭالىقتى كەڭىنەن جاريالاۋعا شاقىرىپ، قاجەت بولعان جاعدايدا ماماندار سۇحبات پەن قوسىمشا ماتەريالدار ۇسىنۋعا دايىن ەكەنىن مالىمدەدى. سونداي-اق قوڭىر وزەنىنىڭ جاعاسىنان تۇسىرىلگەن ۆيدەو جانە سۇحباتتار دا قوسىمشا رەتىندە بەرىلۋى مۇمكىن.
