اباي وبلىسىنىڭ اباي اۋدانى اۋماعىنداعى وردا تاۋىنىڭ شىعىس بەتكەيىندە ورنالاسقان ەرتە تەمىر داۋىرىنە جاتاتىن وردا قونىسىندا ارحەولوگيالىق قازبا جۇمىستارى جۇرگىزىلدى، دەپ حابارلايدى "ادىرنا" ءتىلشىسى.
ء«ا.ح. مارعۇلان اتىنداعى ارحەولوگيا ينستيتۋتى» دەرەگىنشە، زەرتتەۋ جۇمىستارى عىلىم جانە جوعارى ءبىلىم مينيسترلىگى عىلىم كوميتەتىنىڭ BR24992916 «اباي وبلىسىن كەشەندى تاريحي-ارحەولوگيالىق زەرتتەۋ» باعدارلامالىق-نىسانالى قارجىلاندىرۋ جوباسى اياسىندا جۇزەگە اسىرىلدى. ارحەولوگتار قازبا بارىسىندا جالپى اۋماعى 108 شارشى مەتردى قامتيتىن ءبىر تۇرعىن ءۇي قۇرىلىسىن زەرتتەدى. ناتيجەسىندە تۇرعىن ءۇيدىڭ قابىرعالارى ءىرى كولەمدى تاستاردان قالانعانى انىقتالدى. سونداي-اق ءۇيدىڭ وڭتۇستىك-شىعىس بولىگىنەن سوپاقشا ءپىشىندى تاس وشاق تابىلدى. وشاق ماڭىنان ەجەلگى مادەني داقىلداردىڭ قالدىقتارىن انىقتاۋ ماقساتىندا ارحەوبوتانيكالىق تالداۋ جاساۋعا ارنالعان توپىراق ۇلگىلەرى الىندى.
قازبا جۇمىستارى كەزىندە 97 تاس قۇرال، 104 قىش ىدىستىڭ سىنىعى جانە جانۋارلاردىڭ سۇيەك قالدىقتارى تابىلدى. مامانداردىڭ ايتۋىنشا، بۇل ولجالار ەجەلگى تۇرعىنداردىڭ شارۋاشىلىعى مەن تۇرمىس-تىرشىلىگىن جان-جاقتى زەرتتەۋگە مۇمكىندىك بەرەدى. زەرتتەۋ ناتيجەلەرى وردا قونىسىنىڭ تابيعي-گەوگرافيالىق ورنالاسۋى، تۇرعىن ءۇي قۇرىلىسىنىڭ ەرەكشەلىكتەرى جانە تابىلعان ارحەولوگيالىق جادىگەرلەر ونىڭ سارىارقا وڭىرىندەگى ەرتە تەمىر داۋىرىندە ۇزاق ۋاقىت بويى تۇراقتى قونىستانعان ءىرى ەلدى مەكەندەردىڭ ءبىرى بولعانىن كورسەتەدى.
