قىزىلوردا وبلىسىندا قارماقشى اۋدانىنىڭ ورتالىعىنان سولتۇستىككە قاراي 90 شاقىرىم جەردە ورنالاسقان شاح-شاح شاتقالىنان ەجەلگى جانۋاردىڭ قالدىقتارى تابىلدى. الدىن الا دەرەكتەرگە سۇيەنسەك، تابىلعان سۇيەكتەر مەزوزوي ءداۋىرىنىڭ بور كەزەڭىندە ءومىر سۇرگەن دينوزاۆرعا تيەسىلى بولۋى مۇمكىن، دەپ حابارلايدى "ادىرنا".
ەرەكشە ولجا قازىر عالىمداردىڭ قولىنا ءوتتى جانە ول عىلىمي ورتادا ۇلكەن قىزىعۋشىلىق تۋدىردى. پالەونتولوگتار مۇنداي جادىگەرلەردىڭ قازاقستان اۋماعىندا وتە سيرەك كەزدەسەتىنىن اتاپ ءوتتى.
«پالەونتولوگتاردىڭ زەرتتەۋ جۇمىستارى بارىسىندا گادروزاۆر وتريادىنا كىرەتىن ارالوزاۆر 93-86 ملن جىل بۇرىن ءومىر سۇرگەنى انىقتالادى. كەيىن بۇل ايماق ەۋروپالىق پالەونتولوگ-عالىمداردىڭ قىزىعۋشىلىعىن تۋدىرىپ، الەمدىك عىلىمي جۋرنالدارعا ماقالالار جاريالانادى», - دەلىنگەن مۋزەيدىڭ اقپاراتىندا.
وبلىستىق مۇراجاي مەن قارماقشى اۋداندىق تاريحي-ولكەتانۋ مۋزەيىنىڭ قىزمەتكەرلەرى اۋدان تەرريتورياسىنداعى شاح-شاح شاتقالىنا بارلاۋ ەكسپەديتسياسىن ۇيىمداستىرعان.
ەكسپەديتسيا بارىسىندا شاح-شاح شاتقالىنان بور داۋىرىندە ءومىر سۇرگەن تىرشىلىك يەلەرىنىڭ سۇيەكتەرىنىڭ قالدىقتارى تابىلعان. الداعى ۋاقىتتا پالەونتولوگيالىق بۇيىمدار ارنايى ماماندار تاراپىنان مۇقيات زەرتتەلىپ، ناتيجەسى جۇرتشىلىققا جاريا ەتىلمەك.
كەشەندە العاش رەت 1959 جىلى ورىس پالەونتولوگى ا.روجدەستۆەنسكيدىڭ جەتەكشىلىگىمەن عىلىمي-زەرتتەۋ جۇمىستارى جۇرگىزىلەدى. بوزتوبە سۆيتاسىندا ورنالاسقان شاتقالدان مەزوزوي ەراسىنىڭ بور كەزەڭىندە ءومىر سۇرگەن دينوزاۆرلاردىڭ سۇيەكتەرىنىڭ قالدىقتارى تابىلادى. 1968 جىلى باس سۇيەگى عانا تابىلعان دينوزاۆر «ارالوزاۆر» دەگەن اتاۋمەن عىلىمي اينالىمعا ەنگەنى بەلگىلى.
