پاۆلودار وبلىسىندا بولعان ءورت سالدارىنان التى ادام كوز جۇمدى، دەپ حابارلايدى "ادىرنا" ۇلتتىق پورتالى.
قايعىلى وقيعا ەكىباستۇز ماڭىنداعى سولنەچنىي كەنتىنەن جەتى شاقىرىم جەردە ورنالاسقان شارۋا قوجالىعىندا بولعان.
ءورت تۋرالى حابارلاما 9 قازان كۇنى ساعات 06:34-تە تۇسكەن.
وقيعا ورنىنا وبلىستىق توتەنشە جاعدايلار دەپارتامەنتىنىڭ كۇشتەرى دەرەۋ جەتىپ، ءورتتى ءسوندىرۋ شارالارىن جۇرگىزگەن. جالىن 920 شارشى مەتر اۋماققا تاراعان جانە ىرگەلەس عيماراتتاردى دا شارپىعان.
تجد مالىمەتىنشە، ءورت كەزىندە ۇيدە جەتى ادام بولعان. ولاردىڭ ءبىرى 1972 جىلى تۋعان ەر ادام وزدىگىنەن سىرتقا شىعىپ ۇلگەرگەن. ونى جەدەل جاردەم بريگاداسى اۋرۋحاناعا جەتكىزدى.
«وقيعا ورنىنان التى ادامنىڭ ءمايىتى تابىلدى»، — دەپ حابارلادى ءوڭىردىڭ تجد ءباسپاسوز قىزمەتى.
قازىرگى تاڭدا ءورتتىڭ شىعۋ سەبەبى انىقتالىپ جاتىر.
