استانانىڭ ەسىل اۋدانىندا ورنالاسقان ەكى قاباتتى ءدامحانالاردىڭ بىرىندە ءىرى ءورت شىقتى. توتەنشە جاعدايلار مينيسترلىگى ماماندارىنىڭ كاسىبي ارەكەتىنىڭ ارقاسىندا ءتىلسىز جاۋ بۇكىل عيماراتقا جايىلماي، دەر كەزىندە ءسوندىرىلدى، دەپ حابارلايدى "ادىرنا".
ءورت تۋرالى حابارلاما كەزەكشى بولىمگە دەمالىس كۇنى تۇسكەن. وقيعا ەسىل اۋدانىنداعى ەلۋباي تايبەكوۆ كوشەسىنىڭ بويىندا ورنالاسقان ەكى قاباتتى قوعامدىق تاماقتانۋ ورنىندا بولدى.
قۇتقارۋشىلار وقيعا ورنىنا جەتكەندە عيمارات ءىشىن قويۋ ءتۇتىن باسقان. وت ءدامحانانىڭ ءبىرىنشى جانە ەكىنشى قاباتتارىنداعى جيھازداردى شارپىعان. ءورتتىڭ جالپى اۋدانى 80 شارشى مەتردى قۇرادى.
ءورت ءسوندىرۋ بولىمشەلەرىنىڭ ۇيلەسىمدى جۇمىسىنىڭ ارقاسىندا وتتىڭ نىساننىڭ وزگە بولىكتەرىنە تارالۋىنا جول بەرىلمەدى.
ءورت سالدارىنان قازا تاپقاندار مەن جاراقات العاندار جوق. عيماراتتىڭ نەگىزگى قۇرىلىمدارى امان قالدى. قازىرگى ۋاقىتتا ءورتتىڭ شىعۋ سەبەپتەرى مەن ماتەريالدىق شىعىن كولەمى انىقتالىپ جاتىر.
«قويۋ تۇتىنگە قاراماستان، ءورت سوندىرۋشىلەر عيمارات ىشىنە تەز ەنىپ، وتتىڭ وشاعىن وقشاۋلادى. بۇل عيماراتتىڭ تولىق جانىپ كەتۋىنەن ساقتاپ قالدى»، — دەپ حابارلادى ۆەدومستۆودان.
