بەلگىلى قوعام بەلسەندىسى ءارى بادىقوۆانىڭ زاڭدى وكىلى ايگۇل ورىنبەك اكتريسانىڭ بۇرىنعى كۇيەۋى مەن جۋرناليست جىلقىشىبايدىڭ بالا اسىراپ الۋ قۇپياسىن جاريا ەتكەنى ءۇشىن قۇقىق قورعاۋ ورگاندارىنا رەسمي ارىز جولداعانىن مالىمدەدى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، وتباسىلىق جانە جەكە ومىرگە قاتىستى مالىمەتتەردى جاريا ەتۋ - قر قىلمىستىق كودەكسىنىڭ 146-بابى (بالا اسىراپ الۋ قۇپياسىن جاريا ەتۋ) جانە 147-بابى (جەكە ومىرگە قول سۇعۋ) بويىنشا ناقتى قىلمىستىق جاۋاپكەرشىلىككە اكەلەتىن قۇقىقبۇزۋشىلىق.
«كۇيەۋى مۇنى بىلمەۋى مۇمكىن، بىراق جۋرناليستەردىڭ زاڭنان بەيحابار بولۋى مۇمكىن ەمەس. مەن داريعانى كوپ جىلدان بەرى جاقسى تانيمىن. اجىراسۋ كەزەڭىندە قانداي قيىندىقتاردان وتكەنىن دە بىلەمىن. سوندىقتان ونىڭ زاڭدى مۇددەسىن قورعاۋشى وكىلى رەتىندە، جىلقىشىباي مەن دارحاننىڭ ارەكەتىنە قاتىستى قىلمىستىق ءىس قوزعاۋ تۋرالى ارىزدى الماتى قالاسىنىڭ ىشكى ىستەر دەپارتامەنتىنە رەسمي تۇردە جولدايمىن»، – دەدى ايگۇل ورىنبەك.
سونىمەن قاتار، قوعام بەلسەندىسى بۇل جاعدايدى جەكە ادامنىڭ ار-نامىسى مەن ابىرويىن قورعاۋ ماسەلەسىمەن قاتار، جۋرناليستىك ەتيكا مەن زاڭ ۇستەمدىگىنە سىناق رەتىندە باعالادى.
«بارلىق بۇقارالىق اقپارات قۇرالدارىن مەديا زاڭناماسىن قاتاڭ ساقتاۋعا، جەكە تۇلعالاردىڭ ومىرىنە قول سۇقپاۋعا شاقىرامىن. جۋرناليست – ەڭ الدىمەن قوعام الدىنداعى جاۋاپكەرشىلىكتى سەزىنەتىن ادام. سوندىقتان رەيتينگى ءۇشىن بىرەۋدىڭ تاعدىرىن تالقىعا سالۋ – كاسىبي ابىرويعا كولەڭكە تۇسىرەدى»، – دەدى ول.
ايگۇل ورىنبەكتىڭ مالىمدەۋىنشە، قۇقىق قورعاۋ ورگاندارىنا جولدانعان ارىز بويىنشا تەكسەرىس جۇمىستارى باستالۋى ءتيىس.
