قالا اۋماعىنداعى قۇرىلىس جۇمىستارى مەن ساۋلەتتىك جوبالارعا قاتىستى وزەكتى ماسەلەلەردى قارايتىن ارنايى كەڭەس وتىرىسى ءوتتى.
كەڭەس وتىرىسىنا تۇركىستان قالاسى اكىمى ازىمبەك پازىلبەكۇلى مەن سالالىق مەكەمە باسشىلارى، ساۋلەتشىلەر مەن جوبالاۋشى ۇيىم وكىلدەرى، سونداي-اق ينۆەستورلار قاتىستى.
كۇن تارتىبىندە تۇركىستان قالاسىنىڭ باس جوسپارىنا وزگەرىستەر مەن تولىقتىرۋلار ەنگىزۋ، №29 جانە №30 بلوكتارداعى 5 قاباتتى تۇرعىن ءۇي كەشەنىنىڭ قۇرىلىسى، «Ali Residence» تاۋنحاۋس كەشەنىنىڭ جوباسى، ءاىو اۋماعىندا، №11 جانە №38 كوشە قيىلىسىندا ورنالاساتىن تەرراساسى بار مەيرامحانا كەشەنىنىڭ قۇرىلىسى، ءاىو، №11 كوشەسىندە ورنالاساتىن قوناق ءۇي مەن مەيرامحانا كەشەنىنىڭ جوباسى، قوسىمشا 5 قاباتتى تۇرعىن ءۇي كەشەنىنىڭ قۇرىلىسى سىندى التى ماسەلە قارالدى.
كۇن تارتىبىندەگى ءبىرىنشى ماسەلە بويىنشا «مپك-پروەكت» جشس وكىلى بەكزات ءادىلوۆ بايانداما جاسادى. ول ءوز بايانداماسىندا تۇركىستان قالاسىنىڭ باس جوسپارىنا ەنگىزىلەتىن وزگەرىستەر مەن تولىقتىرۋلاردىڭ حالىقارالىق ستاندارتتارعا، اتاپ ايتقاندا، يۋنەسكو تالاپتارىنا سايكەس كەلۋىنىڭ ماڭىزدىلىعىن اتاپ ءوتتى. قوجا احمەت ياساۋي كەسەنەسىنىڭ قورعاۋ ايماعىنىڭ شەكارالارىن ساقتاۋ جانە تاريحي مۇرالاردى قورعاۋ ماقساتىندا جاڭا قۇرىلىس جوبالارىنا قويىلاتىن تالاپتار مەن شەكتەۋلەر ەگجەي-تەگجەيلى تالقىلاندى.
سونىمەن قاتار، «Turan» ارنايى ەكونوميكالىق ايماعى» اق توراعاسىنىڭ مىندەتىن اتقارۋشى نۇرلان بەردىسۇگىروۆ بايانداما جاسادى. ول تۇرعىن ءۇي كەشەندەرىنىڭ قۇرىلىس بارىسى تۋرالى بايانداپ، جوبالارىنىڭ الەۋمەتتىك ماڭىزدىلىعى مەن قالا ينفراقۇرىلىمىن اتاپ ءوتتى.
جيىن بارىسىندا الەۋەتتى ينۆەستورلار مەن جوبالاۋشى كومپانيالار دا ءوز جوبالارىن تانىستىرىپ، ساۋلەت جانە قالا قۇرىلىسى تالاپتارىنا سايكەستىگى تۇرعىسىنان تالقىلاۋعا ۇسىندى.
ءماجىلىس بارىسىندا بارلىق ماسەلەلەر بويىنشا ۇسىنىستار قارالىپ، بىرقاتار جوبالار ماقۇلداندى.
ۇقساس جاڭالىقتار
