قازاقستاندا سالىناتىن اتوم ەلەكتر ستانتسياسىنىڭ (اەس) قاۋىپسىزدىگىنە تەك ۇلتتىق ورگاندار عانا ەمەس، سونىمەن قاتار حالىقارالىق ساراپشىلار دا باقىلاۋ جۇرگىزەدى، دەپ حابارلايدى "ادىرنا".
اگەنتتىك توراعاسى الماسادام ساتقاليەۆتىڭ ايتۋىنشا، قازاقستان يادرولىق قاۋىپسىزدىككە قاتىستى حالىقارالىق كونۆەنتسيالارداعى مىندەتتەمەلەرىن ورىندايدى. وسى ماقساتتا ەلگە ماگاتە ماماندارى شاقىرىلادى.
«ۇيىم قازاقستاندا شولۋ ميسسيالارىن وتكىزۋگە، تەحنيكالىق كومەك بەرۋگە جانە توتەنشە جاعدايلارعا دەن قويۋ جۇيەسىن تالداۋ ءۇشىن EPREV ميسسياسىن جىبەرۋگە دايىن»، – دەپ حابارلادى ۆەدومستۆونىڭ ءباسپاسوز قىزمەتى.
ساتقاليەۆ اتاپ وتكەندەي، اەس-ءتىڭ جۇمىسقا قوسىلۋى كەزەڭ-كەزەڭىمەن جۇزەگە اسادى. ءاربىر قادام – وتىن جۇكتەۋدەن باستاپ تولىق قۋاتقا شىعۋعا دەيىن – تەك سىناق ناتيجەلەرى وڭ بولعان جاعدايدا جانە قاداعالاۋشى ورگاننىڭ رۇقساتىمەن عانا جۇرگىزىلەدى.
شەنەۋنىكتىڭ سوزىنشە، قازاقستان ءۇشىن باستى باسىمدىقتار وزگەرىسسىز قالادى:
- حالىقتىڭ قاۋىپسىزدىگى،
- قورشاعان ورتانى قورعاۋ،
- حالىقارالىق ستاندارتتاردى ساقتاۋ.
