قازاقستان پرەزيدەنتى قاسىم-جومارت توقاەۆ ەل تۇرعىندارىن ەڭبەك كۇنىمەن قۇتتىقتادى. بۇل تۋرالى اقوردا جازدى، دەپ حابارلايدى "ادىرنا".
ول ايانباي ەڭبەك ەتىپ جۇرگەن قازاقستاندىقتارعا ريزاشىلىق ءبىلدىردى.
"ەڭبەك كۇنى قۇتتى بولسىن! بۇل مەرەكەنىڭ ەلىمىز ءۇشىن ايرىقشا ءمانى بار. سەبەبى ەڭبەك پەن ەڭبەكقورلىق – ۇلتتىق يدەولوگيامىزدىڭ ارقاۋىنا اينالعان قۇندىلىقتار.
جۇمىسشى ماماندىقتارى جىلىندا ءبىز ادال ءارى قاجىرلى ەڭبەگىمەن ەلىمىزدىڭ ءوسىپ-وركەندەۋىنە ۇلەس قوسىپ جاتقان سان الۋان كاسىپ يەلەرى مەن ءتۇرلى بۋىن وكىلدەرىنە جانە ەلىمىزدەگى بارشا ەڭبەككەر قاۋىمعا سىي-قۇرمەت كورسەتەمىز.
ەلىمىزدىڭ قۇندىلىقتارى مەن ماقساتتارىنا زور سەنىممەن قاراپ، قاستەرلى وتانىمىز ءۇشىن ايانباي ەڭبەك ەتىپ جۇرگەن، ءاردايىم كاسىبي شەبەرلىگىن شىڭداپ، وندىرىستە جوعارى كورسەتكىشكە قول جەتكىزۋگە ۇمتىلاتىن جانە ءار ىستە العىرلىق پەن جاڭاشىلدىق تانىتاتىن وتانداستارىمىزعا شىنايى ريزاشىلىعىمدى بىلدىرەمىن.
ءبىز قوعامدا ادال ەڭبەكتى كەڭىنەن دارىپتەپ، وسكەلەڭ ۇرپاقتى ەڭبەكقور ەتىپ تاربيەلەي وتىرىپ، قۋاتتى ءارى ادىلەتتى قازاقستاننىڭ مىزعىماس نەگىزىن قالايمىز.
جاۋاپكەرشىلىگى جوعارى، نيەتى تازا، وتانشىل ازاماتتارىمىزدىڭ ارقاسىندا ءبىز دامىعان جانە وركەنيەتتى ەل بولۋ مىندەتىن ابىرويمەن ورىندايمىز دەپ سەنەمىن.
قازاقستاننىڭ بارلىق ازاماتىنا زور دەنساۋلىق، باق-بەرەكە جانە تولاعاي تابىس تىلەيمىن!", - دەيدى توقاەۆ قۇتتىقتاۋىندا.
