Bügın Qazaqstan halqy Assambleiasynyŋ 30 jyldyǧy aiasynda Şymkent qalasyndaǧy Ortalyq saiabaqta Qazaqstan Respublikasy özbekterı etnomädeni bırlestıkterı «Dўstlik» qauymdastyǧynyŋ ūiymdastyruymen «Özbek etnosynyŋ tılı, mädenietı jäne salt-dästürı künı» keŋınen atalyp öttı.
Merekelık şaranyŋ şymyldyǧy Şymkent qalalyq özbek drama teatry ärtısterınıŋ Abai men Älışer Nauai beinelerın somdaǧan erekşe sahnalyq körınısımen aşylyp, qonaqtar ūlttyq qūndylyqtardy aişyqtaǧan körmelerdı tamaşalady.
Is-şaraǧa QR Parlamentı Senatynyŋ deputaty Alişer Satvaldiev, QR Prezidentı Äkımşılıgı Qazaqstan halqy Assambleiasy Hatşylyǧynyŋ sektor meŋgeruşısı Qairat Baimoldinov, Özbekstan Respublikasynyŋ Qazaqstandaǧy Tötenşe jäne Ökılettı Elşısı Bahtiior İbragimov, «Dўstlik» qauymdastyǧynyŋ töraǧasy İkramjan Haşimjanov, Şymkent qalasy Işkı saiasat jäne jastar ısterı jönındegı basqarma basşysynyŋ m.a. Zaŋǧarbek Usupahmetov, Şymkent qalasynyŋ «Qoǧamdyq kelısım» KMM basşysy Nürken Älımqūlov, Şymkent qalalyq özbek etnomädeni bırlestıgınıŋ töraǧasy Tahirbek Nişanbaev jäne qoǧam belsendılerı qatysty.
Konserttık baǧdarlama Memlekettık Änūranmen bastalyp, teatr ärtısterınıŋ «Qoş keldıŋız» kompozisiiasymen jalǧasty. Mukimi atyndaǧy №13 mekteptıŋ «Bahor» bi ansamblı özbek halqynyŋ ūlttyq «Şodlik» biın jäne qazaq biın tartu ettı. Şymkent qalalyq drama teatry «Sary Jailau» kompozisiiasyn sahnalap, körermennıŋ ystyq yqylasyna bölense, qalalyq opera jäne balet teatrynyŋ änşısı Nematilla Zikrillaev Tölegen Mūhamedjanovtyŋ «Otan» jäne A.Zasepinnıŋ «Tyŋda» änderın oryndap, merekenıŋ sänın keltırdı. Sondai-aq teatr ärtısı Şahista Usmanova özbek halqynyŋ äsem äuenı – «Mustahzod» änın şyrqady.
Merekelık jiyn barysynda bırqatar azamattar etnomädeni bailanystardy nyǧaituǧa qosqan ülesı üşın marapattaldy.
