قوستانايدا الاش قوزعالىسىنىڭ كورنەكتى قايراتكەرى، ۇلت ۇستازى مىرجاقىپ دۋلاتۇلىنىڭ تۋعانىنا 140 جىل تولۋىنا وراي ەسكەرتكىش اشىلدى، دەپ حابارلايدى "ادىرنا" ۇلتتىق پورتالى.
سالتاناتتى شاراعا ءماجىلىس توراعاسى ەرلان قوشانوۆ قاتىسىپ، پرەزيدەنت قاسىم-جومارت توقاەۆتىڭ قۇتتىقتاۋ حاتىن وقىدى. مەملەكەت باسشىسى مىرجاقىپ دۋلاتۇلىنىڭ قازاق حالقىنىڭ ازاتتىعى مەن ۇلتتىق رۋحىن كوتەرۋدەگى ەڭبەگىن، ادەبيەتتى جاڭا دەڭگەيگە كوتەرگەنىن اتاپ ءوتتى.
ءىس-شاراعا قوستاناي وبلىسىنىڭ اكىمى قۇمار اقساقالوۆ، ءماجىلىس دەپۋتاتتارى، زيالى قاۋىم وكىلدەرى مەن جەرگىلىكتى جۇرتشىلىق قاتىستى. قازاقستاننىڭ حالىق جازۋشىسى تولەن ابدىك پەن اعارتۋشىنىڭ ۇرپاعى ەرلان ساتىبالدىەۆ تا ءسوز سويلەپ، قايراتكەردىڭ ەڭبەگىن ەسكە الدى.
مەرەيتوي اياسىندا تورعايدا حالىقارالىق «ۇلى دالا جورىعى» اتتى ات مارافونى باستالىپ، قاتىسۋشىلار 500 شاقىرىمدى ەڭسەرمەك.
سونداي-اق وڭىردە عىلىمي كونفەرەنتسيا مەن رەسپۋبليكالىق ايتىس وتەدى. ەرلان قوشانوۆ بۇل شارالاردىڭ اۋقىمى حالىقتىڭ مىرجاقىپ دۋلاتۇلى مۇراسىنا دەگەن قۇرمەتىنىڭ ايعاعى ەكەنىن اتاپ ءوتىپ، بۇگىنگى قازاقستاننىڭ دامۋى الاش ارداقتىلارى ارمانداعان تاۋەلسىزدىك مۇراتىنا ساي ەكەنىن جەتكىزدى.
