استانا پوليتسياسى قازاقستان جەرىندە 1932-1933 جىلدارى بولعان اشارشىلىق قۇرباندارىنا ورناتىلعان ەسكەرتكىشتەگى بالانىڭ ءمۇسىنىن ۇرلادى دەگەن كۇدىكتىنىڭ ۇستالعانىن مالىمدەدى. قولا ءمۇسىن مەتالل قابىلدايتىن پۋنكتەن تابىلعان.
"1932-1933 جىلدارداعى اشتىق قۇرباندارىنا ورناتىلعان ەسكەرتكىش كەشەننەن ءمۇسىن ۇرلادى دەلىنگەن كۇدىكتى مەن ۇرلانعان ءمۇسىندى ساتىپ الدى دەگەن كۇدىكتى انىقتالدى" دەلىنگەن استانا قالالىق ىشكى ىستەر دەپارتامەنتىنىڭ ءباسپاسوز قىزمەتىندە.
پوليتسيا "ۇرلىق" جانە "قىلمىستىق جولمەن تابىلعان مۇلىكتى يەلەنۋ نەمەسە وتكىزۋ" باپتارى بويىنشا تەرگەۋ باستالعانىن حابارلادى. كۇدىكتى ۋاقىتشا ۇستاۋ اباقتىسىنا جابىلعان.
ەسكەرتكىش كەشەننەن بالانىڭ ءمۇسىنى ۇرلانعانى تۋرالى 2017 جىلى جازدا حابارلانعان. بيىلعى جىلدىڭ باسىندا ۇرلانعان ءمۇسىننىڭ ورنىنا قايتادان قۇيىلعان ءمۇسىن ورناتىلعان ەدى. پوليتسيانىڭ مالىمەتىنشە، ءمۇسىن ەكىنشى رەت وتكەن ايدا ۇرلانعان.
استانادا "قاسىرەت قابىرعاسى" دەپ اتالاتىن كومپوزيتسيانىڭ جانىنداعى 1932-1933 جىلدارداعى اشارشىلىق قۇرباندارىنا ورناتىلعان ەسكەرتكىش رەسمي تۇردە 2012 جىلى 31 مامىردا اشىلعان.
___________________________________________________________________________________________________________-
azattyq.org
