وزبەكستان پرەزيدەنتى شاۆكات ميرزيوەۆ پەداگوگتەرعا ارنالعان بىرقاتار جاڭا الەۋمەتتىك جەڭىلدىكتەر مەن قولداۋ تەتىكتەرىن جاريالادى، دەپ حابارلايدى "ادىرنا" ۇلتتىق پورتالى فەرعاناعا سىلتەپ.
2026 جىلدان باستاپ جوعارى بىلىكتىلىك ساناتى بار جانە 15 جىلدان استام ەڭبەك ءوتىلى بار مۇعالىمدەر ءۇشىن يپوتەكالىق نەسيەگە باستاپقى جارنانىڭ 25%-ىن مەملەكەت وتەيدى. سونىمەن قاتار مەكتەپ مۇعالىمدەرى ءۇشىن مەملەكەتتىك قىزمەتتەر قۇنى ەكى ەسە تومەندەتىلەدى.
پرەزيدەنتتىڭ ايتۋىنشا، كەلەسى وقۋ جىلىنان باستاپ مۇعالىمدەردىڭ بالالارى مەملەكەتتىك جوو-لارعا اقىلى نەگىزدە تۇسكەن جاعدايدا، وقۋ اقىسىنا 30% جەڭىلدىك بەرىلەدى. بۇعان قوسا، پەداگوگتار جاڭا تەحنولوگيالاردى وقۋ پروتسەسىنە ەنگىزۋ ماقساتىندا كومپيۋتەر ساتىپ الۋ ءۇشىن 10 ملن سۋمعا دەيىن (شامامەن $805) جەڭىلدەتىلگەن نەسيە الا الادى.
باستاۋىش سىنىپ مۇعالىمدەرىنە دە ۇلتتىق سەرتيفيكات جۇيەسى ەنگىزىلىپ، ونىڭ يەگەرلەرى جالاقىسىنا اي سايىن 15% ۇستەماقى الادى. ال ۇزدىك ديپلوممەن مەكتەپكە كەلگەن باكالاۆر تۇلەكتەرىنە اۆتوماتتى تۇردە ەكىنشى، ماگيسترلەرگە ءبىرىنشى سانات بەرىلەدى. الەمدىك ۇزدىك-300 ۋنيۆەرسيتەتتىڭ بىرىنە تۇسكەن پەداگوگتار ءۇشىن $20 مىڭعا دەيىن جەڭىلدەتىلگەن نەسيە قاراستىرىلعان.
كاسىپتىك-تەحنيكالىق ءبىلىم بەرۋ سالاسىنداعى وقىتۋشىلارعا دا قولداۋ كورسەتىلەدى. ۇلتتىق سەرتيفيكات العاندارعا جالاقىسىنا 30%، حالىقارالىق سەرتيفيكات يەلەرىنە 50% ۇستەماقى قوسىلادى. سونداي-اق تەحنيكۋم ديرەكتورلارى مەن ورىنباسارلارىنىڭ جالاقىسى ءوسىپ، عىلىمي دارەجەسى بار پەداگوگتارعا دا قوسىمشا تولەمدەر ەنگىزىلەدى.
ميرزيوەۆتىڭ سوزىنشە، سوڭعى سەگىز جىلدا ەلدىڭ ەكونوميكاسى ەكى ەسەگە ءوسىپ، ءجىو كولەمى بيىلدىڭ سوڭىنا قاراي $130 ملرد-قا جەتپەك. وسى كەزەڭدە ءبىلىم بەرۋ سالاسىنا جۇمسالاتىن شىعىندار التى ەسەگە ارتىپ، 378 ترلن سۋمعا ($30,4 ملرد) جەتكەن.
پرەزيدەنت مۇعالىمدەردىڭ جاعدايىن جاقسارتۋ مەن ءبىلىم ساپاسىن ارتتىرۋ وزبەكستان رەفورمالارىنىڭ باستى باسىمدىعى بولىپ قالا بەرەتىنىن اتاپ ءوتتى.
