Özbekstan prezidentı Şavkat Mirziioev pedagogterǧa arnalǧan bırqatar jaŋa äleumettık jeŋıldıkter men qoldau tetıkterın jariialady, dep habarlaidy "Adyrna" ūlttyq portaly Ferǧanaǧa sıltep.
2026 jyldan bastap joǧary bılıktılık sanaty bar jäne 15 jyldan astam eŋbek ötılı bar mūǧalımder üşın ipotekalyq nesiege bastapqy jarnanyŋ 25%-yn memleket öteidı. Sonymen qatar mektep mūǧalımderı üşın memlekettık qyzmetter qūny ekı ese tömendetıledı.
Prezidenttıŋ aituynşa, kelesı oqu jylynan bastap mūǧalımderdıŋ balalary memlekettık JOO-larǧa aqyly negızde tüsken jaǧdaida, oqu aqysyna 30% jeŋıldık berıledı. Būǧan qosa, pedagogtar jaŋa tehnologiialardy oqu prosesıne engızu maqsatynda kompiuter satyp alu üşın 10 mln sumǧa deiın (şamamen $805) jeŋıldetılgen nesie ala alady.
Bastauyş synyp mūǧalımderıne de ūlttyq sertifikat jüiesı engızılıp, onyŋ iegerlerı jalaqysyna ai saiyn 15% üstemaqy alady. Al üzdık diplommen mektepke kelgen bakalavr tülekterıne avtomatty türde ekınşı, magistrlerge bırınşı sanat berıledı. Älemdık üzdık-300 universitettıŋ bırıne tüsken pedagogtar üşın $20 myŋǧa deiın jeŋıldetılgen nesie qarastyrylǧan.
Käsıptık-tehnikalyq bılım beru salasyndaǧy oqytuşylarǧa da qoldau körsetıledı. Ūlttyq sertifikat alǧandarǧa jalaqysyna 30%, halyqaralyq sertifikat ielerıne 50% üstemaqy qosylady. Sondai-aq tehnikum direktorlary men orynbasarlarynyŋ jalaqysy ösıp, ǧylymi därejesı bar pedagogtarǧa da qosymşa tölemder engızıledı.
Mirziioevtıŋ sözınşe, soŋǧy segız jylda eldıŋ ekonomikasy ekı esege ösıp, JIÖ kölemı biyldyŋ soŋyna qarai $130 mlrd-qa jetpek. Osy kezeŋde bılım beru salasyna jūmsalatyn şyǧyndar alty esege artyp, 378 trln sumǧa ($30,4 mlrd) jetken.
Prezident mūǧalımderdıŋ jaǧdaiyn jaqsartu men bılım sapasyn arttyru Özbekstan reformalarynyŋ basty basymdyǧy bolyp qala beretının atap öttı.
