وزبەكستان پرەزيدەنتى شاۆكات ميرزيوەۆ پەن ەلدىڭ وزگە دە رەسمي تۇلعالارى تاشكەنتتەگى «شاحيدلار حوتيراسي» اللەياسىندا وتكەن ەسكە الۋ راسىمىنە قاتىستى, دەپ حابارلايدى "ادىرنا".
مەملەكەت باسشىسى تاۋەلسىزدىك پەن ازاتتىق جولىندا قازا تاپقان اتا-بابا رۋحىن ۇلىقتاۋ قاسيەتتى پارىز ەكەنىن اتاپ ءوتتى.
«وسى كۇندەرى بۇكىل ەل بولىپ ۇلتتىق تاۋەلسىزدىگىمىزدىڭ 35 جىلدىعىن ۇلكەن قۋانىشپەن اتاپ ءوتىپ جاتىرمىز. مىنە، 35 جىلدان بەرى ءبىز ەشكىمگە تاۋەلدى بولماي، بەيبىت ءارى اشىق اسپان استىندا ەركىن جانە باقۋاتتى ءومىر ءسۇرىپ كەلەمىز. بۇل – ۇلكەن باقىت ءارى باعا جەتپەس قۇندىلىق. وسىنداي ايتۋلى كۇندەرى تاۋەلسىزدىك پەن ازاتتىق جولىندا قۇربان بولعان قاھارمان اتا-بابالارىمىزدى ەسكە الىپ، ولاردىڭ جارقىن رۋحىنا تاعزىم ەتۋ – قاسيەتتى پارىزىمىز»، – دەدى شاۆكات ميرزيوەۆ.
ءدىني قىزمەتكەرلەر جانە زيالى قاۋىم وكىلدەرىمەن كەزدەسۋدە پرەزيدەنت وتكەن عاسىردىڭ 1980-جىلدارىندا مىڭداعان وتانداسىنىڭ ساياسي قۋعىن-سۇرگىنگە ۇشىراعانىن ايتتى. ولار «ماقتا ءىسى» جانە «وزبەك ءىسى» دەپ اتالعان ىستەر اياسىندا قولدان جاسالعان ايىپتارمەن قۋدالانعان.
1983-1990 جىلدار ارالىعىندا وزبەكستاندا 40 مىڭ ادام تەرگەۋگە تارتىلىپ، ولاردىڭ 5 مىڭى قىلمىستىق جاۋاپكەرشىلىككە تارتىلعان. مەملەكەت باسشىسى وسى كەزەڭدەگى وقيعالارعا قاتىستى تاريحي ادىلەتتىلىكتى قالپىنا كەلتىرۋ جۇمىستارى جالعاسا بەرەتىنىن اتاپ ءوتتى.
شاۆكات ميرزيوەۆ قازىرگى تاڭدا الەمدە قارۋلى قاقتىعىستار مەن ساياسي تەكەتىرەستەردىڭ كۇشەيىپ، ولاردىڭ وزبەكستانعا جاقىن ايماقتارعا دا تارالىپ جاتقانىنا الاڭداۋشىلىق ءبىلدىردى.
ء«بىزدىڭ جولىمىز – بەيبىتشىلىك، دوستىق جانە ىنتىماقتاستىق جولى. وزبەكستان بۇل باعىتتان ەشقاشان تايمايدى»، – دەدى پرەزيدەنت.
