اقش پرەزيدەنتى دونالد ترامپ رەسەيگە قارسى قاتاڭ سانكتسيالار ەنگىزۋگە دايىن ەكەنىن ايتتى، دەپ حابارلايدى "ادىرنا" ۇلتتىق پورتالى.
بۇل تۋرالى اق ءۇي باسشىسى سەنبى كۇنى ءوزىنىڭ Truth Social الەۋمەتتىك جەلىسىندەگى پاراقشاسىندا جاريالاعان «پرەزيدەنت دونالد دج. ترامپتىڭ بارلىق ناتو ەلدەرىنە جانە بۇكىل الەمگە جولداعان حاتى» اتتى جازباسىندا ايتقان.
الايدا ول سانكتسيا ءۇشىن ەكى شارت قويىپ وتىر. بارلىق ناتو ەلدەرى ۆاشينگتوننىڭ قادامىن قولداپ، ءدال سونداي شارا قولدانۋى كەرەك. سونداي-اق، رەسەي مۇنايىن ساتىپ الۋدى توقتاتۋى قاجەت،
ترامپتىڭ ايتۋىنشا، كەيبىر ەلدەردىڭ ماسكەۋدەن مۇناي ساتىپ الۋى رەسەيگە قىسىمدى السىرەتىپ وتىر.
«مەن ارەكەت ەتۋگە دايىنمىن، سەندەر دايىن بولساڭدار بولدى. ماعان قاشان ەكەنىن ايتىڭدار»، – دەدى اقش باسشىسى.
سونداي-اق ول توپ بولىپ قىتايدان كەلەتىن تاۋارلارعا 50–100 پايىزدىق كەدەندىك باج سالىعىن ەنگىزۋدى ۇسىندى. بۇل شارا رەسەيگە قاتىستى بەيجىڭنىڭ ىقپالىن السىرەتەدى دەپ اتاپ ءوتتى.
ترامپ قازىرگى قاقتىعىستى ءوزىنىڭ ەمەس، «بايدەن مەن زەلەنسكيدىڭ سوعىسى» دەپ اتاپ، ونى توقتاتۋدىڭ باستى ماقساتى – مىڭداعان رەسەيلىك پەن ۋكرايندىقتىڭ ءومىرىن ساقتاپ قالۋ ەكەنىن جەتكىزدى.
بۇعان دەيىن ول رەسەي پرەزيدەنتى ۆلاديمير پۋتينگە قاتىستى سابىرى تاۋسىلىپ بارا جاتقانىن ايتىپ، ماسكەۋ مەن كيەۆ كەلىسسوزدەرگە دايىن بولماي وتىرعانىنا وكىنىش بىلدىرگەن ەدى.
