سۋرەت جي كومەگىمەن جاسالدى
اقش پرەزيدەنتى دونالد ترامپ 2026 جىلعى نوبەل بەيبىتشىلىك سىيلىعىنىڭ وڭتۇستىكافريكالىق زاڭگەر ناۆانەتحەم (ناۆي) پيللەيگە بەرىلۋىنە قاتىستى پىكىر ءبىلدىردى، دەپ حابارلايدى "ادىرنا" ءتىلشىسى.
ول Truth Social الەۋمەتتىك جەلىسىندەگى جازباسىندا بەيبىتشىلىك ورناتۋ جولىنداعى ەڭبەگى ءۇشىن بۇل ماراپاتقا ءوزىن لايىق سانايتىنىن جازعان. ترامپتىڭ ايتۋىنشا، ول سىيلىقتىڭ جاڭا يەگەرى تۋرالى جانە ونىڭ قانداي ەڭبەگى ءۇشىن ماراپاتتالعانىنان حابارسىز. ال ءوزى سەگىز سوعىستى توقتاتقانىن ايتىپ، ءبىر ەمەس، سەگىز نوبەل بەيبىتشىلىك سىيلىعىنا لايىق ەكەنىن جەتكىزدى.
اقش پرەزيدەنتى سوعىستاردى رەتتەۋگە ۇلەس قوستىم دەگەن ەلدەر مەن تاراپتاردى اتاپ ءوتتى. ولاردىڭ قاتارىندا كامبودجا مەن تايلاند، كوسوۆو مەن سەربيا، كونگو دەموكراتيالىق رەسپۋبليكاسى مەن رۋاندا، پاكىستان مەن ءۇندىستان، يزرايل مەن يران، مىسىر مەن ەفيوپيا، ارمەنيا مەن ازەربايجان، سونداي-اق يزرايل مەن حاماس بار.
ترامپ يراننىڭ يادرولىق قارۋ جاساۋىنا جول بەرمەگەنىن جانە كوپتەگەن ادامنىڭ ءومىرىن ساقتاپ قالعانىن دا اتاپ ءوتتى. سونىمەن قاتار ۆەنەسۋەلاداعى ساياسي جاعدايعا ارالاسۋىن، كورەي تۇبەگى مەن باسقا دا ايماقتارداعى قاقتىعىستاردىڭ الدىن الۋعا قوسقان ۇلەسىن ءوز جەتىستىكتەرىنىڭ قاتارىنا قوستى.
اقش پرەزيدەنتى نوبەل بەيبىتشىلىك سىيلىعىنىڭ وزىنە بەرىلمەگەنىنە نارازىلىق ءبىلدىرىپ، بىرىككەن ۇلتتار ۇيىمىنىڭ قاقتىعىستاردى رەتتەۋدەگى ءرولىن سىنعا الدى. ونىڭ پىكىرىنشە، ءوزى اتقارعان جۇمىستارعا قاراماستان، ماراپاتتىڭ باسقا ادامعا بەرىلۋى نوبەل سىيلىعىنىڭ بەدەلىنە نۇقسان كەلتىرەدى.
بۇعان دەيىن 2026 جىلعى نوبەل بەيبىتشىلىك سىيلىعى ادام قۇقىقتارىن قورعاۋ جانە حالىقارالىق قۇقىقتى دامىتۋ سالاسىنداعى ەڭبەگى ءۇشىن وڭتۇستىكافريكالىق زاڭگەر ناۆي پيللەيگە بەرىلگەنى حابارلانعان ەدى. ول اسكەري قىلمىستار، ادامزاتقا قارسى قىلمىستار مەن گەنوتسيدكە قاتىستى سوت پروتسەستەرىنە قاتىسقان.
