اقش پرەزيدەنتى دونالد ترامپتىڭ اكىمشىلىگى بۇرىنعى پرەزيدەنت باراك وباما كەزەڭىندە قابىلدانعان پارنيكتىك گازداردىڭ ادام دەنساۋلىعىنا زيانى تۋرالى عىلىمي قورىتىندىنى قايتا قاراۋعا كىرىستى، دەپ حابارلايدى "ادىرنا" ۇلتتىق پورتالى Report-قا سىلتەپ.
بۇل شەشىم كليماتتىق رەتتەۋلەردى السىرەتۋگە باعىتتالعان ءىرى قادام رەتىندە باعالانۋدا.
اقش قورشاعان ورتانى قورعاۋ اگەنتتىگىنىڭ (EPA) 2009 جىلعى قورىتىندىسى بويىنشا، التى ءتۇرلى پارنيكتىك گاز حالىقتىڭ دەنساۋلىعى مەن ءال-اۋقاتىنا نەگىزگى قاۋىپ توندىرەدى دەپ تانىلعان ەدى. بۇل تۇجىرىم ەلەكتر ستانتسيالارىنىڭ، كولىك قۇرالدارىنىڭ جانە ءوندىرىستىڭ زياندى شىعارىندىلارىن شەكتەۋگە ارنالعان كوپتەگەن ەكولوگيالىق ەرەجەلەردىڭ قۇقىقتىق نەگىزىنە اينالعان.
قازىرگى ۋاقىتتا ترامپ اكىمشىلىگى وسى «قاۋىپ ءتوندىرۋ تۋرالى قورىتىندىنى» جويۋعا دايىندالىپ جاتىر. ەگەر بۇل جۇزەگە اسسا، پارنيكتىك گازداردى رەتتەۋدىڭ قۇقىقتىق بازاسى السىرەۋى مۇمكىن. ساراپشىلار بۇل اقش تاريحىنداعى ەڭ ءىرى ەكولوگيالىق دەرەگۋلياتسيالاردىڭ ءبىرى بولۋى مۇمكىن ەكەنىن ايتادى.
جوسپارلانعان وزگەرىستەر، ەڭ الدىمەن، اۆتوكولىك شىعارىندىلارىنا قاتىستى فەدەرالدىق ستاندارتتارعا اسەر ەتۋى مۇمكىن. ال ەلەكتر ستانتسيالارى، مۇناي-گاز وبەكتىلەرى سياقتى ستاتسيونارلىق كوزدەرگە قاتىستى تالاپتار ازىرگە ساقتالۋى مۇمكىن، بىراق بولاشاقتا ولار دا وزگەرۋى ىقتيمال.
سونىمەن قاتار، سوڭعى جىلدارى اقش-تا كليمات ساياساتىنا بايلانىستى عىلىمي جانە ساياسي پىكىرتالاستار كۇشەيىپ وتىر. مىسالى، ەنەرگەتيكا سالاسىنداعى كەيبىر زەرتتەۋلەرگە قاتىستى سىن ايتىلىپ، عالىمدار مەن ساياساتكەرلەر اراسىندا كوزقاراس قايشىلىعى بايقالۋدا.
ەكولوگتار مەن ساراپشىلاردىڭ ءبىر بولىگى ەكولوگيالىق شەكتەۋلەردىڭ السىرەۋى حالىق دەنساۋلىعىنا قاۋىپ ءتوندىرۋى مۇمكىن ەكەنىن ايتادى. ولار اتموسفەراعا شىعارىلاتىن زياندى زاتتاردىڭ ارتۋى بالالار مەن وسال توپتارعا كەرى اسەر ەتۋى ىقتيمال ەكەنىن اتاپ وتەدى.
ايتا كەتەيىك، دونالد ترامپ 2025 جىلى پرەزيدەنت قىزمەتىنە كىرىسكەننەن كەيىن اقش-تى پاريج كليمات كەلىسىمىنەن شىعارۋ تۋرالى جارلىققا قول قويعان بولاتىن. بۇل قۇجات بويىنشا 190-نان استام ەل جاھاندىق تەمپەراتۋرانىڭ ءوسۋىن شەكتەۋ ءۇشىن پارنيكتىك گازدار شىعارىندىلارىن ازايتۋعا مىندەتتەنگەن.
