دونالد ترامپ دۇيسەنبى كۇنى كەشكە اقش-تىڭ 47-ءشى پرەزيدەنتى رەتىندە اق ۇيگە العاش رەت كەلىپ، ستاديوندا جاقتاستارىنىڭ الدىندا 9 قۇجاتتى بەكىتتى. بۇل تۋرالى ۆۆس جازدى، دەپ حابارلايدى “ادىرنا” ۇلتتىق پورتالى.
اقش پرەزيدەنتى جاڭا شەشىم بويىنشا اقش دۇنيەجۇزىلىك دەنساۋلىق ساقتاۋ ۇيىمىنان شىقتى.
ترامپ 2021 جىلدىڭ 6 قاڭتارىندا كاپيتولي عيماراتىنا باسىپ كىرگەن 1600-عا جۋىق ادامدى كەشىرۋ تۋرالى جارلىققا قول قويدى.
كاپيتولي ءىسى بويىنشا ترامپتىڭ جاقتاستارى دجو بايدەننىڭ پرەزيدەنتتىك جەڭىسىن مويىنداماي كاپيتوليگە شابۋىل جاساپ، ۆاشينگتوندا تارتىپسىزدىك ۇيىمداستىرعان ەدى.
«ولار بۇگىن بوستاندىققا شىعادى دەپ ۇمىتتەنەمىن، ولار سونى كۇتىپ وتىر. شامامەن 1500 ادام»، — دەدى ترامپ.
سونداي-اق ترامپ كوتەرىلىسكە باستامشى بولعان ءارى شابۋىلدى جوسپارلاۋعا كومەكتەستى دەگەن ايىپپەن سوتتالعان اسىرە وڭشىل Oath Keepers جانە Proud Boys توپتارىنىڭ 14 مۇشەسىنىڭ ۇكىمدەرىن جەڭىلدەتتى.
ەڭ ۇزاق 22 جىل جازاسىن وتەپ جاتقان Proud Boys كوشباسشىسى ەنريكە تارريونىڭ ادۆوكاتى CBS News-كە ونىڭ كليەنتىنىڭ جاقىن ارادا بوساتىلۋى كۇتىلەتىنىن ايتتى.
بۇيرىق سونىمەن قاتار اقش باس پروكۋرورىنان ءالى سوتتا قارالىپ جاتقان 300-گە جۋىق ءىستى توقتاتۋدى تالاپ ەتىپ وتىر.
ەسكە سالايىق، كەشە، 20 قاڭتار كۇنى دونالد ترامپ ەكىنشى رەت اقش پرەزيدەنتى اتاندى.
