اقش پرەزيدەنتى دونالد ترامپ يرانمەن ساۋدا جاسايتىن ەلدەردىڭ يمپورتتىق تاۋارلارىنا قوسىمشا كەدەندىك تاريفتەردى كوتەرۋگە مۇمكىندىك بەرەتىن جارلىققا قول قويدى، دەپ حابارلايدى "ادىرنا" ۇلتتىق پورتالى ۆۆس-گە سىلتەپ.
قۇجاتتا ناقتى تاريف مولشەرى كورسەتىلمەگەن.
مىسالى، «جارلىق كۇشىنە ەنگەن كۇننەن باستاپ قوسىمشا ادۆالورلىق تاريف — مىسالى، 25% — اقش-قا يمپورتتالاتىن جانە يراننان كەز كەلگەن جولمەن تاۋار نەمەسە قىزمەت العان ەلدەردەن شىعارىلاتىن ونىمدەرگە قولدانىلۋى مۇمكىن» دەپ كورسەتىلگەن.
ترامپ بۇل 25%-دىق مولشەردى 12 قاڭتاردا Truth Social سايتىندا دا اتاپ وتكەن.
جارلىقتا اقش پرەزيدەنتى يراندى «يادرولىق مۇمكىندىكتەردى ارتتىرۋعا ۇمتىلۋ، تەرروريزمدى قولداۋ، بالليستيكالىق زىمىرانداردى دامىتۋ جانە ايماقتىق دەستابيليزاتسيا ءۇشىن جاۋاپتى» دەپ تانىدى. بۇل ارەكەتتەر اقش قاۋىپسىزدىگىنە، وداقتاستارىنا جانە مۇددەلەرىنە قاۋىپ توندىرەدى دەپ ايتىلعان.
يران ازىرگە ۆاشينگتوننىڭ جاڭا شەشىمىنە قاتىستى رەسمي كوممەنتاري جاساعان جوق.
يراننىڭ نەگىزگى ەكسپورتتىق ءونىمى — شيكى مۇناي. Reuters اگەنتتىگىنىڭ 12 قاڭتارداعى حابارلاۋىنشا، اناليتيكالىق Kpler كومپانياسىنىڭ دەرەكتەرى بويىنشا يراننان ەكسپورتتىڭ شامامەن 80%-ى قىتايعا باعىتتالعان. الايدا قىتايدىڭ كەدەن ستاتيستيكاسىندا 2022 جىلدان باستاپ يراننان تىكەلەي مۇناي جەتكىزىلىمدەرى جوق، سەبەبى شيكىزات ءۇشىنشى ەلدەردە قايتا وڭدەلىپ، مالايزيا نەمەسە يندونەزيادان شىققانداي راسىمدەلەدى.
