باتىس قازاقستان وبلىسىندا مەملەكەت باسشىسىنىڭ جولداۋىن جۇزەگە اسىرۋ ماسەلەلەرى تالقىلاندى. باتىس قازاقستان وبلىسىنىڭ اكىمى ناريمان تورەعاليەۆتىڭ توراعالىعىمەن مەملەكەت باسشىسىنىڭ جولداۋىنان تۋىندايتىن مىندەتتەردى جۇزەگە اسىرۋعا ارنالعان كەڭەس وتىرىسى ءوتتى.
جيىنعا وبلىس اكىمىنىڭ ورىنباسارلارى، باسقارما مەن دەپارتامەنت باسشىلارى، قالا جانە اۋدان اكىمدەرى، اگروقۇرىلىمدار وكىلدەرى، ساياسي پارتيالار جەتەكشىلەرى مەن قوعام بەلسەندىلەرى قاتىستى.
كەڭەستە پرەزيدەنت قاسىم-جومارت توقاەۆتىڭ ەلىمىزدىڭ الەۋمەتتىك-ەكونوميكالىق دامۋىنا قاتىستى باسىم باعىتتارى تالقىلانىپ، ناقتى تاپسىرمالاردى ورىنداۋ جولدارى پىسىقتالدى. جولداۋدا اتاپ كورسەتىلگەن 7 نەگىزگى باعىتتىڭ ارقايسىسى – ەل دامۋىنداعى ماڭىزدى قادام.
الەۋمەتتىك ادىلەتتىلىك – باستى قاعيدا
وبلىستىق ءماسليحاتتىڭ توراعاسى مۇرات مۇقاەۆتىڭ ايتۋىنشا، پرەزيدەنتتىڭ الەۋمەتتىك ساياساتقا ەرەكشە ءمان بەرۋى – قۇپتارلىق ءىس.
– مەملەكەتتىك الەۋمەتتىك كومەك شىنىمەن مۇقتاج جاندارعا باعىتتالۋى ءتيىس. بۇل – قوعامداعى ادىلەتتىلىك پەن جاۋاپكەرشىلىكتى قالىپتاستىرۋدىڭ ماڭىزدى تەتىگى. وكىنىشكە قاراي، سوڭعى كەزدە كەيبىر ازاماتتار جاردەماقىنى تۇراقتى تابىس كوزىنە اينالدىرىپ وتىر. مۇنداي جاعدايلار قوعامداعى جاۋاپكەرشىلىك داعدارىسىن كورسەتەدى، – دەدى مۇرات مۇقاەۆ.
ستاتيستيكالىق دەرەكتەرگە سۇيەنسەك، 2025 جىلى وبلىستىق بيۋدجەتتەن الەۋمەتتىك كومەك پەن جاردەماقىعا 20 ملرد تەڭگەدەن استام قارجى، ونىڭ ىشىندە اتاۋلى الەۋمەتتىك كومەككە 2 ملرد تەڭگە بولىنەدى. بۇل – ءوڭىر بيۋدجەتىنىڭ الەۋمەتتىك سالاعا جۇمسالاتىن ەلەۋلى ۇلەسى.
ينۆەستيتسيا – ەكونوميكالىق ءوسىم كەپىلى
پرەزيدەنت جولداۋدا ينۆەستيتسيالىق ساياساتتىڭ جاڭا باعىتىن ايقىنداپ بەردى. ياعني، ينۆەستيتسيانىڭ باسىم بولىگى شيكىزات ەمەس، وڭدەۋ ونەركاسىبىنە، شاعىن جانە ورتا بيزنەسكە، جوعارى تەحنولوگيالىق جوبالارعا باعىتتالۋى قاجەت. بۇل رەتتە باتىس قازاقستان وبلىسىندا بىرقاتار اۋقىمدى جوبالار ىسكە اسۋدا. ماسەلەن، 2024 جىلى وبلىستاعى ينۆەستيتسيالار كولەمى 749,9 ملرد تەڭگەگە جەتىپ، ونىڭ 72,6 پايىزى جەكە ينۆەستيتسيالار قۇرادى. الداعى 5 جىلدا 2,2 ترلن تەڭگەگە 73 ءىرى جوبا جۇزەگە اسىرىلادى.
بقو كاسىپكەرلەر پالاتاسى ديرەكتورىنىڭ ورىنباسارى ەلميرا وتەشەۆا ينۆەستيتسيا تارتۋدا تۋىندايتىن بىرقاتار ماسەلەلەرگە توقتالدى. ونىڭ ايتۋىنشا، جەر قاتىناستارى، ينجەنەرلىك ينفراقۇرىلىمعا قوسىلۋ، سۋبسيديالاۋ جانە سالىق سالۋ ماسەلەلەرى ينۆەستورلار ءۇشىن باستى تۇيتكىل بولىپ وتىر.
تسيفرلاندىرۋ – جاڭا مۇمكىندىكتەر
وبلىس اكىمىنىڭ ايتۋىنشا، وڭىردە تسيفرلاندىرۋ دەڭگەيى 96 پايىزعا جەتكەن. تسيفرلىق تەحنولوگيالار ءبىلىم بەرۋ، دەنساۋلىق ساقتاۋ، تۇرعىن ءۇي-كوممۋنالدىق شارۋاشىلىق، جول جانە سۋ سالاسىنا دەندەپ ەنۋدە. ماسەلەن، ماحامبەت وتەمىسوۆ اتىنداعى بقۋ ستۋدەنتتەرى جاساندى ينتەللەكتىنى دامىتۋ باعىتىندا بەلسەندى جۇمىس ىستەۋدە.
«اگروسەرۆيس-باتىس» جشس ديرەكتورى ارمات بيسەنوۆ اگروسالادا جاساندى ينتەللەكتىنىڭ قولدانىلۋى تۋرالى بايانداسا، «قازسۋشار» رمك فيليالىنىڭ ديرەكتورى راۋان قۇسايىنوۆ سۋ رەسۋرستارىن تسيفرلاندىرۋ باعىتىنداعى جۇمىستارمەن ءبولىستى.
وڭدەۋ ونەركاسىبى – باستى نازاردا
جيىن بارىسىندا وبلىس اكىمى ناريمان تورەعاليەۆ ينۆەستيتسيالىق جوبالارعا قاتىستى ناقتى تاپسىرمالار بەردى. ول، اسىرەسە، وڭدەۋ ونەركاسىبىن قولداۋعا باسا نازار اۋداردى.– جوعارى قوسىلعان قۇندى ءونىم شىعاراتىن كاسىپورىندارعا قولداۋ كورسەتىپ، ەكسپورتتىق الەۋەتىن ارتتىرۋ كەرەك. ونىمدەردى حالىقارالىق ستاندارتتار بويىنشا سەرتيفيكاتتاۋ مەن شەتەل نارىعىنا ىلگەرىلەتۋ – باستى مىندەت. سونىمەن قاتار، يندۋستريالىق ايماقتاردىڭ جاعدايىن سارالاپ، ولاردىڭ الەۋەتىن بارىنشا ءتيىمدى پايدالانۋ قاجەت، – دەدى ايماق باسشىسى.
سونداي-اق، اكىم اۋىل شارۋاشىلىعىن دامىتۋ، اينالىمعا قايتارىلعان جەرلەردى ءتيىمدى پايدالانۋ، سۋ قويمالارىن قالپىنا كەلتىرۋ ماسەلەلەرىن دە كوتەردى.كەڭەس وتىرىسىندا ايتىلعان ۇسىنىستار مەن بەرىلگەن تاپسىرمالار – ءوڭىردىڭ دامۋ قارقىنىن جەدەلدەتۋگە باعىتتالعان ناقتى قادامدار. جولداۋدا كورسەتىلگەن مىندەتتەردى ورىنداۋ – ءاربىر سالا جەتەكشىسىنىڭ، ءاربىر مەملەكەتتىك ورگاننىڭ باستى جاۋاپكەرشىلىگى. ال وسى باعىتتاعى تابىستى جۇمىس – ەلدىڭ وركەندەۋىنە ۇلەس قوسادى.
ۇقساس جاڭالىقتار
