پرەزيدەنت قاسىم-جومارت توقاەۆ ەلىمىزگە ءتيىستى دەڭگەيدە ينۆەستيتسيا تارتا الماي وتىرعان كەيبىر اكىمدەر مەن مينيسترلەرگە ەسكەرتۋ جاسادى. بۇل تۋرالى ول بۇگىن قازاقستان حالقىنا جولداۋىندا ايتتى، دەپ حابارلايدى “ادىرنا” ۇلتتىق پورتالى.
مەملەكەت باسشىسى ينۆەستيتسيالىق احۋالدى جانە بيزنەس جۇرگىزۋگە قاجەتتى جاعدايدى جاقسارتۋ جولىندا ۇزدىكسىز جۇمىس ىستەۋ ماڭىزدى دەگەن ۇستانىمدا.
“دۇنيە جۇزىندە ينۆەستيتسياعا تالاس ءورشىپ تۇرعان كەزدە ەلگە قارجى تارتۋ ءۇشىن «ءدال وسى جەردە جانە ءدال قازىر» قاعيداسى بويىنشا شەشىم قابىلداۋ – ەڭ قاجەت شارا. سوندىقتان ۇكىمەت جانىنداعى ينۆەستيتسيا شتابىنا اۋقىمدى قۇزىرەت بەرىلدى. بۇل قادام مەتالدى تەرەڭ وڭدەۋ، مۇناي-گاز-كومىر حيمياسى، تۋريزم، ەنەرگەتيكا جانە ماشينا جاساۋ سياقتى ماڭىزدى سالالارداعى جوبالاردى جۇزەگە اسىرۋ قارقىنىن ارتتىرۋعا جول اشتى. ەكونوميكاعا سالىنعان تىكەلەي ينۆەستيتسيا كولەمىن ازايتىپ الماۋ ءۇشىن وسى باعىتتاعى جۇمىستى كۇشەيتۋ كەرەك. كەيبىر اكىمدەر مەن مينيسترلەر ينۆەستور تارتۋ ىسىنە ءجوندى اتسالىسپاي وتىرعانىن اتاپ وتكىم كەلەدى. ۇكىمەت بۇل شارۋانى رەتكە كەلتىرۋگە ءتيىس”، - دەدى توقاەۆ جولداۋدا.
پرەزيدەنت مەملەكەتتىك-جەكەمەنشىك ارىپتەستىك ارقىلى ىسكە اسىرىلاتىن جوبالاردى ساپالى ازىرلەۋ كەرەك ەكەنىن اتاپ ءوتتى
“اسىرەسە، حالىقارالىق قارجى ينستيتۋتتارى قاتىساتىن جوبالارعا باسا نازار اۋدارۋ كەرەك. ۇكىمەتكە حالىقارالىق قارجى ۇيىمدارى مەملەكەتتىك-جەكەمەنشىك ارىپتەستىك تاسىلىمەن قارجىلاندىرىپ، تولىق جۇزەگە اسىراتىن اۋقىمدى جوبالاردىڭ ءتىزىمىن جاساۋدى تاپسىرامىن. مەن بيىل مامىردا «ەكونوميكانى ىرىقتاندىرۋ شارالارى تۋرالى» جارلىققا قول قويدىم. بۇل قۇجاتتا كورسەتىلگەن تالاپتار مۇلتىكسىز ورىندالۋعا ءتيىس”، - دەدى مەملەكەت باسشىسى.
