بقو بايقونىس اۋىلىنداعى تۇرمىستىق قالدىقتار پوليگونىنان مەديتسينالىق قالدىقتاردىڭ تابىلۋىنا بايلانىستى تەكسەرۋ باستالدى، دەپ حابارلايدى "ادىرنا" ۇلتتىق پورتالى.
بقو سانيتاريالىق-ەپيدەميولوگيالىق باقىلاۋ دەپارتامەنتىنىڭ مالىمەتىنشە، 5 ماۋسىم كۇنى قوقىس اۋماعىنان قولدانىلعان شپريتستەر مەن بيولوگيالىق ماتەريالى بار پروبيركالار انىقتالعان. وقيعا تۋرالى حابار تۇسكەننەن كەيىن سانيتاريالىق-ەپيدەميولوگيالىق باقىلاۋ باسقارماسىنىڭ ماماندارى پوليتسيا جانە وزگە دە مەملەكەتتىك ورگاندار قىزمەتكەرلەرىمەن بىرگە وقيعا ورنىنا بارىپ، مەديتسينالىق قالدىقتاردىڭ توگىلگەنىن راستادى.
ۆەدومستۆونىڭ حابارلاۋىنشا، اتالعان دەرەك پوليتسيا ورگاندارىندا تىركەلىپ، تەكسەرۋ جۇمىستارى جۇرگىزىلۋدە. الدىن الا مالىمەت بويىنشا، مەديتسينالىق قالدىقتاردى جيناۋ جانە جويۋمەن اينالىساتىن ۇيىمنىڭ قىزمەتكەرلەرى قالدىقتاردى زاڭسىز توگۋى مۇمكىن. قازىرگى ۋاقىتتا اۋماق ءتيىستى مەملەكەتتىك ورگانداردىڭ باقىلاۋىنا الىنعان.
بايتەرەك اۋداندىق اكىمدىگىنىڭ ناقتىلاۋىنشا، 4 ماۋسىم كۇنى ساعات 23:30 شاماسىندا بايقونىس اۋىلدىق وكرۋگى اۋماعىنداعى پوليگونعا «گازەل» اۆتوكولىگىمەن قالدىقتاردى زاڭسىز توگۋ فاكتىسى انىقتالعان. تەكسەرۋ بارىسىندا مەديتسينالىق ماقساتتا پايدالانىلعان سىناما الۋ پروبيركالارى، بەينەامپۋلالار جانە وزگە دە مەديتسينالىق قالدىقتاردى توگىپ جاتقان ازامات قۇقىق قورعاۋ ورگاندارى قىزمەتكەرلەرىمەن وقيعا ورنىندا ۇستالعان.
وقيعا ورنىنا اۋدان پروكۋراتۋراسى مەن سانيتاريالىق-ەپيدەميولوگيالىق باقىلاۋ باسقارماسىنىڭ وكىلدەرى بارىپ، ءتيىستى تەكسەرۋ جۇمىستارىن جۇرگىزدى. سانيتاريالىق-ەپيدەميولوگيالىق باقىلاۋ قىزمەتىنىڭ ماماندارى اكىمشىلىك حاتتاما تولتىرعان.
قازىرگى ۋاقىتتا قۇقىق قورعاۋ ورگاندارى وقيعانىڭ بارلىق ءمان-جايىن انىقتاپ جاتىر. تەرگەۋ امالدارى جالعاسۋدا. كىنالى تۇلعالار انىقتالعان جاعدايدا ولارعا قازاقستان رەسپۋبليكاسىنىڭ زاڭناماسىنا سايكەس شارا قولدانىلادى.
