تۇركيا پرەزيدەنتى جەر سىلكىنىسى سالدارىنان باسپاناسىز قالعاندارعا پاتەر كىلتىن تابىس ەتتى، دەپ حابارلايدى "ادىرنا" پورتالى انادولى اقپارات اگەنتتىگىنە سىلتەپ.
رەجەپ تايىپ ەردوعان ەلدە بولعان ءزىلزالا سالدارىنان زارداپ شەككەندەر مەن باسپاناسىز قالعانداردىڭ كوپ ەكەنىن ايتتى.
«زەرتتەۋ جۇمىستارى جۇرگىزىلگەننەن كەيىن جەر سىلكىنىسى بولعان ايماقتا بەنەفيتسيار سانى 390 مىڭ ادام بولاتىنى انىقتالدى. بۇگىن ءبىز 7 مىڭ 275 ازاماتقا باسپانا كىلتىن تابىستاپ جاتىرمىز، ونىڭ 6 مىڭ 572-ءسى پروۆينتسيا جانە اۋدان ورتالىقتارىندا، 703-ءى - اۋىلدىق جەرلەردە. جىلدىڭ سوڭىنا دەيىن ءبىز 200 مىڭ ءۇيدى تاپسىرىپ، ءبىرىنشى تاس قالانعاننان كەيىن قۇرلىسىتى ءبىر جىل ىشىندە اياقتاۋ تۋرالى ۋادەمىزدى ورىندايمىز. ءبىزدىڭ ماقساتىمىز – اي سايىن 15-20 مىڭ ءۇي مەن كەنتتەگى ۇيلەردى زاڭدى يەلەرىنە بەرۋ»، - دەدى پرەزيدەنت ەردوعان.
وتكەن جىلدىڭ 6 اقپانىندا ەپيتسەنترى تۇركيانىڭ وڭتۇستىك-شىعىسىنداعى قاحرامانماراشتا ماگنيتۋداسى 7-دەن اساتىن ەكى جەر سىلكىنىسى بولعان. ەلدىڭ 10 پروۆينتسياسى، سيريادا دا ءدۇمپۋ قاتتى سەزىلدى.
ءتىپتى تۇركيا مەن سيريادا مىڭداعان ادام قازا تاپتى. تۇركيانىڭ وڭتۇستىك-شىعىسىندا بولعان جويقىن جەر سىلكىنىسىنەن قازا تاپقاندار سانى 50 مىڭ ادامنان استى.
«ازاماتتارىمىز تىنىش بولسىن. ولار ءوز مەملەكەتى مەن ۇكىمەتىنە سەنۋى كەرەك. ماقساتتارىمىزعا قاراي العا جىلجىپ جاتقاندا ىقتيمال قاۋىپتەردى، اسىرەسە جەر سىلكىنىستەرىن، لاڭكەستىك جانە ەكونوميكالىق تۇزاقتاردى ءبىر-بىرلەپ جويۋعا بەل بۋدىق»، - دەپ اتاپ ءوتتى تۇركيا پرەزيدەنتى ءسوز سوڭىندا.
