باسپاناعا سۇرانىس ءالى ازايا قويعان جوق. كەيبىرى ءتىپتى سوڭعى جيعان-تەرگەنىن جۇمساپ، قارىزدانىپ، قاۋعالانىپ ءۇي الىپ جاتقان شىعار. وسى تۇستا كەيبىر وڭىردە باسپانا باعاسى ءىرى مەگاپوليستەردەگى باعامەن بىردەي بولىپ قالعانىن ايتۋ كەرەك. ماسەلەن، پەتروپاۆلدا ءۇي سۇمدىق قىمباتتادى دەگەن قاۋەسەت تاراۋدا. جاڭادان سالىنعان باسپانا بولسىن، ەسكىسى بولسىن، قاي-قايسىنىڭ باعاسى قالتانى قاعادى. قازىر شاھاردا پاتەردىڭ ءبىر شارشى مەترى ورتا ەسەپپەن 320 مىڭ تەڭگەدەن باستالادى، دەپ حابارلايدى "ادىرنا" ۇلتتىق پورتالى 24.kz سايتىنا سىلتەپ.
- وسى كۇنى پەتروپاۆلدا ءبىر بولمەلى پاتەر الۋ ءۇشىن قانشا قاراجاتىڭىز بولۋى كەرەك؟ قازىر وڭىردە قانشا ادام ءۇي كەزەگىندە تۇر؟
- قازىرگى تاڭدا قالادا ءبىر بولمەلى پاتەر ساتىپ الۋ ءۇشىن قالتاڭىزدا كەم دەگەندە 14-15 ميلليون تەڭگە قاراجاتىڭىز بولۋى قاجەت. ال 3-4 بولمەلىلەرى 40-50 ميلليونعا دەيىن كەتىپ قالادى. ايلىعى شايلىعىنا جەتپەي جۇرگەن قاراپايىم حالىق ءۇشىن از اقشا ەمەس ارينە. بىراق قىمباتشىلىق قىسپاققا الىپ، نارىقتىق باعا باعىنباي تۇرسا دا ايماقتا باسپانا الۋعا سۇرانىس ەش كەمىگەن ەمەس. مامانداردىڭ ايتۋى بويىنشا وتكەن جىلمەن سالىستىرعاندا پاتەر قۇنى ورتا ەسەپپەن 20 پروتسەنتكە وسكەن. بۇعان قۇرىلىس ماتەريالدارىنىڭ قىمباتتاۋى دا اسەر ەتپەي قويمادى. ال ۇكىمەت زەينەتاقى قورىنىڭ ءبىر بولىگىن ءۇي الۋعا جۇمساۋعا رۇقسات بەردى. مۇنىمەن قوسا تەڭگەنىڭ تۇراقسىزدىعىنا بايلانىستى حالىقتىڭ كوبىنىڭ قازىر باسپانا الىپ قالعىلارى كەلەتىنى راس. ال ساتىلىمعا شىعارىلعان ۇيلەر سوڭعى كەزدەرى كەرىسىنشە ازايا باستاعان.
وسى سۇراق بويىنشا ريەلتورلىق كومپانيا وكىلدەرىنىڭ بەرگەن جاۋابى:
"جاسىراتىنى جوق، كورشى ەلدەگى جاعداي بىزدەگى جىلجىمايتىن مۇلىك نارىعىنا دا اسەر ەتپەي قويمادى. ماسەلەن، سوڭعى ون كۇندە بىرنەشە بانك پايىزدىق مولشەرلەمەسىن 5 پروتسەنتكە دەيىن جوعارلاتىپ جىبەردى. مۇنىمەن قوسا رەسەيگە كوشۋدى جوسپارلاپ وتىرعاندار ويلارىنان جاپپاي اينىپ جاتىر. بۇل دا باعانىڭ قىمباتتاۋىنا سەپتىگىن تيگىزەدى. نەگە دەسەڭىز، ساتىلىمعا شىعارىلعان باسپانالار سانى ازايىپ جاتىر. ياعني باسەكەلەستىك بولماعان جەردە باعا شارىقتايتىنى ايتپاسا دا تۇسىنىكتى" دەپ جاۋاپ بەردى جىلجىمايتىن مۇلىك اگەنتتىگىنىڭ جەتەكشىسى گۇلميرا عالىمجانوۆا.
بىلتىر پەتروپاۆلدا 222 مىڭ شارشى مەتردى قۇرايتىن باسپانا حالىق يگىلىگىنە تاپسىرىلعان ەكەن. بىراق بۇل ازدىق ەتىپ وتىر. ويتكەنى قازىرگى تاڭدا قالالىق اكىمدىكتە 15 مىڭعا جۋىق ادام پاتەر كەزەگىندە تۇر. مامانداردىڭ ايتۋى بويىنشا جازعا قاراي باعا تاعى شارىقتاماسا ارزاندامايدى. جالپى پەتروپاۆل باسپانا باعاسى قىمبات قالالاردىڭ تىزىمىندە. قازىردىڭ شاھار بەسىنشى ورىندا تۇر.
"ادىرنا" ۇلتتىق پورتالى
