6 قازان، استانا قالاسىندا رەسپۋبليكالىق «زەردەلى» وقۋ ورتالىعى قۇرىلعانىنا 10 جىل تولعان مەرەيتويىن اتاپ ءوتتى. سالتاناتتى شارادا ورتالىقتىڭ نەگىزىن قالاۋشى اعايىندى ىرىسبەك جانە وجەت ءماۋىت ۇزدىك پەداگوگتەرگە پاتەر سەرتيفيكاتى مەن دۋبايعا جولداما سىيلادى.
«زەردەلىنىڭ 10 جىلدىعىمەن قاتار كەلگەن ۇستازدار كۇنىندە 7 مۇعالىمگە باسپانا الۋعا قولداۋ كورسەتتىك. بۇعان دەيىن دە 25 ۇستازىمىزدىڭ ءۇيلى بولۋىنا قولداۋ كورسەتكەن ەدىك. بۇل ءۇردىس ءالى دە جالعاسا بەرمەك. ۇستازدىق ەتىپ، جاس ورەننىڭ ءوسىپ، ونۋىنە عۇمىرىن سارپ ەتكەن جاندار ءۇشىن قانداي قولداۋ كورسەتسەك تە لايىقتى. تاعى ءبىر توسىن سىي ول - 15 ادامعا دۋبايعا دەمالىس جولداماسىن بەردىم. تەك وتكەن وقۋ جىلىندا زەردەلىدە قىزمەت جاساعان 100-گە جاقىن ۇستازدارىمىز وسىنداي جولدامامەن دۋبايدا دەمالىپ كەلگەن ەكەن»، - دەدى ىرىسبەك ءماۋىت.
بۇگىندە ەلىمىزدىڭ 18 وبلىسىندا زەردەلىنىڭ 41 ورتالىعى، 7 مەكتەبى، 50-گە جاقىن بولىمشەسى بار. ءبىر عانا استانانىڭ وزىندە 500-گە جۋىق پەداگوگ قىزمەت اتقارادى.
«مەرەكەدە ساپالى ءارى ادال قىزمەتتەرى ءۇشىن اقشالاي سىياقى، ايفوننىڭ سوڭعى ۇلگىسى دە قىزمەتكەرلەرىمىزگە تابىستالدى. پرەزيدەنتىمىزدىڭ «پەداگوگ مارتەبەسىن كوتەرۋ – مەملەكەتتىك ساياساتتىڭ ماڭىزدى بولىگى» دەگەن ءسوزىن ەسكە الا وتىرىپ، ۇستازدارىمىزعا قۇرمەت پەن ماتەريالدىق قولداۋدىڭ قاتار ءجۇرۋى قاجەت دەپ سانايمىز»، - دەدى كاسىپكەر-پەداگوگ.
ايتا كەتەتىنى، مەرەكەلىك كەشكە ەلىمىزدىڭ مادەنيەت جانە ونەر قايراتكەرلەرى كەلىپ، ءان مەن جىردان شاشۋ شاشتى. قۇرمەتتى قوناقتاردىڭ قاتارىندا ءداستۇرلى ءانشى ەرلان رىسقالي مەن اقىن قالقامان سارين بولدى.
ايتا كەتەيىك، «زەردەلى» ورتالىعى – ەلىمىزدەگى دارىندى وقۋشىلارعا باعىتتالعان ءبىلىم بەرۋ ورتالىقتارىنىڭ ءبىرى. 10 جىل ىشىندە ول ەلىمىزدىڭ ەڭ ءىرى وقۋ ورىندارىنىڭ بىرىنە اينالدى.
