اقتوبە اۋەجايىندا «قازمۇنايگاز» ۇك اق ەنشىلەس كومپانياسى – قمگ-اەرو جاڭا وتىن قۇيۋ كەشەنىن سالۋ جوباسىن ىسكە اسىرا باستادى. جوبانىڭ ءبىرىنشى كەزەڭىندە ينجەنەرلىك-گەولوگيالىق زەرتتەۋ جۇمىستارى جۇرگىزىلەدى. ولاردىڭ ماقساتى – بولاشاق وندىرىستىك نىسانداردىڭ قاۋىپسىزدىگى مەن ۇزاق ۋاقىت بويى پايدالانۋىن قامتاماسىز ەتۋ ءۇشىن توپىراقتىڭ سيپاتتامالارىن جانە جەراستى سۋلارىنىڭ دەڭگەيىن جان-جاقتى زەرتتەۋ. اتالمىش جۇمىستار اياقتالعاننان كەيىن نەگىزگى قۇرىلىس باستالادى.
جوبا مەملەكەت باسشىسى بەلگىلەگەن مىندەتتەرگە سايكەس جۇزەگە اسىرىلۋدا جانە اقتوبە اۋەجايىن زاماناۋي حالىقارالىق حابقا اينالدىرۋداعى ماڭىزدى كەزەڭ بولماق.
جاڭا وتىن قۇيۋ كەشەنى اۋە كەمەلەرىن رت جانە تس-1 ماركالى وتىندارمەن عانا ەمەس، سونىمەن قاتار حالىقارالىق نارىقتا سۇرانىسقا يە Jet A-1 اۆياوتىنىمەن دە قامتاماسىز ەتۋگە مۇمكىندىك بەرەدى. بۇل ستاندارتقا كوشۋ – قازاقستاندى جاھاندىق اۋە كولىگى جەلىسىمەن ينتەگراتسيالاۋ ءۇشىن قاجەت، سونداي-اق بۇل بولاشاقتا ەكولوگيالىق تازا اۆياوتىن (SAF) قولدانۋدىڭ مىندەتتى تالابى.
جوبا ەكى ىسكە قوسۋ كەشەنىنىڭ قۇرىلىسىن كوزدەيدى. ءبىرىنشى كەزەڭدە كولەمى 600 تەكشە مەتر بولاتىن ءموبيلدى وتىن قۇيۋ كەشەنى سالىنىپ، ەكى وتىن قۇيۋ كولىگى ساتىپ الىنادى. ەكىنشى كەزەڭدە نەگىزگى نىسان بوي كوتەرەدى – وتىن قۇيۋ كەشەنىنىڭ 20,2 مىڭ تەكشە مەتر وتىن ساقتاۋعا ارنالعان رەزەرۆۋار پاركى، تەمىرجول قۇيۋ-ءتۇسىرۋ ەستاكاداسى جانە ديسپەتچەرلىك ورتالىق.
ينۆەستيتسيا كولەمى شامامەن 5 ملرد تەڭگەگە باعالانعان، جوبانى ىسكە اسىرۋ اياسىندا 50-دەن اسا تۇراقتى جۇمىس ورنى اشىلادى. وسىلايشا، اقتوبە اۋەجايى تولىققاندى اۆياتسيالىق حابقا اينالىپ، قازاقستاننىڭ ورتالىق ازياداعى نەگىزگى ترانزيتتىك توراپ رەتىندەگى ءرولى كۇشەيتىلمەك.
