اقش-تىڭ ازەربايجانداعى ەلشىلىگىنىڭ ەكونوميكا جونىندەگى كەڭەسشىسى ەشلي تاۋەرس AZAL اۋە كومپانياسىنىڭ ۇشاعى قۇلاعان جەرگە باردى. بۇل تۋرالى ەلشىلىك الەۋمەتتىك رەسمي پاراقشاسىندا جازدى، دەپ حابارلايدى «ادىرنا» ءتىلشىسى.
«اقتاۋدان اتتانار الدىندا اقش-ازەربايجان ساۋدا پالاتاسىنىڭ اتقارۋشى ديرەكتورى ناتيگ باحىشوۆ پەن اقش-تىڭ ازەربايجانداعى ەلشىلىگىنىڭ ەكونوميكا جونىندەگى كەڭەسشىسى ەشلي تاۋەرس AZAL جولاۋشىلار ۇشاعى اپاتقا ۇشىراعان جەرگە باردى. ءبىز بۇل جەردە قايعىلى جاعدايدا قازا تاپقان بەيبىت جانداردىڭ رۋحىنا تاعزىم ەتتىك. ۇشاقتىڭ سىنىقتارى ءالى كۇنگە دەيىن اۋماققا شاشىلىپ جاتىر، بۇل كورىنىس جوعالعان ومىرلەردى ەسكە تۇسىرەتىن قايعىلى بەلگى بولىپ تۇر»، – دەلىنگەن حابارلامادا.
ەسكە سالا كەتەيىك، 2024 جىلدىڭ 25 جەلتوقساندا اقتاۋ قالاسىنىڭ ماڭىنا Azerbaijan Airlines اۋەكومپانياسىنىڭ Embraer E190 جولاۋشى ۇشاعى قۇلاعان بولاتىن. بورتتاعى 67 ادامنىڭ 38-ءى قازا تاپقان. بۇعان دەيىن ازەربايجان تاراپى ۇشاقتى رەسەيدىڭ زەنيتتىك كەشەندەرى اتىپ ءتۇسىردى دەگەن مالىمدەمە جاساعان ەدى.
