اقتاۋ ماڭىندا اپاتقا ۇشىراعان AZAL ۇشاعىنىڭ ەكيپاج مۇشەلەرى - يگور كشنياكين، الەكساندر كاليانينوۆ جانە حوكۋما اليەۆانىڭ جەكە زاتتارىن وتباسىلارى ءازىربايجان ۇلتتىق تاريح مۇراجايىنا تاپسىردى. بۇل تۋرالى «Azerbaycan Airlines» كومپانياسى مالىمدەدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، سالتاناتتى شاراعا قاتىسۋشىلار قاھارمانداردىڭ ەرلىگى مەن جانقيارلىعى حالىق جادىندا ماڭگى ساقتالاتىنىن اتاپ ءوتتى.
«ءبىزدىڭ قاھارمان ەكيپاجىمىزدىڭ جەكە زاتتارىن مۇراجايعا تاپسىرۋ جانە ولاردىڭ ەرلىگىن ماڭگى قالدىرۋ AZAL كومانداسى ءۇشىن ۇلكەن قۇرمەت جانە ماقتانىش»، - دەلىنگەن حابارلامادا.
ەسكە سالساق، Azerbaijan Airlines اۋەكومپانياسىنىڭ Embraer ERJ 190-100 جولاۋشى ۇشاعى بىلتىر 25 جەلتوقساندا اقتاۋ ماڭىنا قۇلادى. قازا تاپقان 38 ادامنىڭ التاۋى – قازاقستاننىڭ، 25 ادام – ازەربايجاننىڭ، جەتەۋى - رەسەي ازاماتتارى.
ازەربايجان پرەزيدەنتى يلحام اليەۆ ۇشاق اپاتىنا "رەسەيدىڭ وكىلدەرى جاۋاپتى" دەپ مالىمدەدى. اليەۆ رەسەيدەن كىناسىن مويىنداۋدى جانە وسى وقيعاعا كىنالىلەردى جازالاۋدى تالاپ ەتتى. رەسەي پرەزيدەنتى ۆلاديمير پۋتين ازەربايجان ۇشاعىنىڭ اپاتقا ۇشىراۋىنا بايلانىستى كەشىرىم سۇراعان بولاتىن.
