«وتىرار كىتاپحاناسى» عىلىمي ورتالىعى عالىمدارى «تاۋاريح-ي حامسا-ي شارقي – شىعىستىڭ بەس ەلىنىڭ تاريحى» ەڭبەگىنىڭ 1–2 كىتاپتارىن دايىنداپ، باسپادان شىعاردى، دەپ حابارلايدى "ادىرنا" ۇلتتىق پورتالى.
بۇل تۋرالى «وتىرار كىتاپحاناسى» عىلىمي ورتالىعىنىڭ باسشىسى، تاريح عىلىمدارىنىڭ دوكتورى داناگۇل ماحات جەلىدەگى پاراقشاسىندا جازدى.
اباي وبلىسى اكىمدىگىنىڭ جانە قۇربانعالي ءحاليديدىڭ شوبەرەسى سافاريا تەڭىزباەۆانىڭ قولداۋىمەن جارىق كورگەن بۇل ەڭبەكتەر قازاق حالقىنىڭ رۋحاني-مادەنيەتى مەن عىلىمىنا ولشەۋسىز ەڭبەك سىڭىرگەن كورنەكتى تاريحشى قۇربانعالي ءحاليديدىڭ عىلىمي مۇراسىن كەڭىنەن ناسيحاتتاۋعا ارنالعان.
كىتاپتار «قۇربانعالي حاليدي: تاريح، تانىم جانە تاعىلىم» تاقىرىبىنداعى حالىقارالىق عىلىمي-پراكتيكالىق كونفەرەنتسيادا وقىرمانعا تانىستىرىلاتىن بولادى.
قۇربانعالي حاليدي - قازاق حالقىنىڭ تاريحىن، ادەت-عۇرپىن، اۋىز ادەبيەتى مەن مادەنيەتىن زەرتتەۋشى.
