بۇگىن سەمەيدەگى ۆودنىي كەنتىندە «كەلەشەك مەكتەپتەرى» جوباسى اياسىندا 600 ورىندىق جاڭا مەكتەپ پايدالانۋعا بەرىلدى. نىساننىڭ اشىلۋ سالتاناتىنا وبلىس اكىمى بەرىك ءۋالي، قازاقستاننىڭ ەڭبەك ەرى، ۇلاعاتتى ۇستاز الما شۇكىجانوۆا قاتىستى.
ۆودنىي كەنتىنىڭ بالالارى ەندى ەڭسەلى دە زاماناۋي عيماراتتا ءبىلىم الادى. بۇل – «كەلەشەك مەكتەپتەرى» جوباسى شەڭبەرىندە بوي كوتەرگەن سەمەي قالاسىنداعى ەكىنشى، ال اباي وبلىسى بويىنشا ءۇشىنشى مەكتەپ.
ءۇش قاباتتى مەكتەپتە 28 وقۋ كابينەتى، فيزيكا، حيميا، بيولوگيا، روبوتوتەحنيكا، گرافيكا جانە مودەلدەۋ بولمەلەرى، اعاش جانە مەتالل وڭدەۋ، تىگىن جانە كۋليناريا شەبەرحانالارى بار. سونىمەن قاتار اكت زالى، اسحانا، 7 زەرتحانا، كىتاپحانا، وقۋ زالى مەن كوۆوركينگ ايماقتارى قاراستىرىلعان. اۋلادا فۋتبول، ۆولەيبول، باسكەتبول الاڭدارى، جۇگىرۋ جولاقتارى مەن سپورت زالى بار.
مەكتەپ ءبىر اۋىسىمدا، مەملەكەتتىك تىلدە ءبىلىم بەرەدى. 1-11 سىنىپ ارالىعىندا 22 سىنىپ-كومپلەكت جانە 1 مەكتەپالدى دايارلىق سىنىپ اشىلادى.
سالتاناتتى شاراعا قاتىسقان ايماق باسشىسى ۇستازدار مەن اتا-انالاردى، وقۋشىلاردى ايتۋلى وقيعامەن قۇتتىقتادى.
«ەلىمىزدە مەملەكەت باسشىسى قاسىم-جومارت كەمەلۇلى توقاەۆتىڭ باستاماسىمەن جۇزەگە اسىپ جاتقان «كەلەشەك مەكتەپتەرى» ۇلتتىق جوباسى اياسىندا كوپتەگەن جاڭا وقۋ ورىندارى سالىنىپ جاتىر. ءبىزدىڭ وڭىرىمىزدە دە بىرنەشەۋى بوي كوتەردى. وسىنداي كەلەلى باستامالار ارقىلى بالالارعا قولايلى، قاۋىپسىز، زاماناۋي ءبىلىم بەرۋ ورتاسىن قالىپتاستىرۋعا باعىتتالعان جۇيەلى قادامدى كورۋگە بولادى. سونىڭ ايقىن كورىنىسى – بۇگىن سەمەي قالاسىنىڭ ۆودنىي كەنتىندە بوي كوتەرگەن 600 ورىندىق جاڭا مەكتەپ. بۇل – ۇستازدىڭ ارمانىن، اتا-انانىڭ سەنىمىن، بالانىڭ ءۇمىتىن توعىستىرعان ورتاق قۋانىش. بۇگىنگى اشىلعان مەكتەپ – بولاشاققا دەگەن سەنىمنىڭ سيمۆولى. بارشاڭىزدى جاڭا وقۋ جىلىنىڭ باستالۋىمەن شىن جۇرەكتەن قۇتتىقتايمىن»، – دەدى وبلىس اكىمى.
ايماق باسشىسى مەكتەپتىڭ سىنىپتارىن، اسحانا، سپورت زالدى كورىپ، وقۋشىلارمەن، مۇعالىمدەرمەن پىكىرلەستى.
«ۆودنىي كەنتىندە مۇنداي زاماناۋي مەكتەپ بولماعان. تۇرعىندار ۇزاق جىل بويى كۇتتى. وتە قۋانىشتىمىز. بارلىق تۇرعىنداردىڭ اتىنان شىن جۇرەكتەن العىس ايتامىز. مەكتەبىمىز ۇلكەن ءبىلىم ورداسى بولسىن. تۇلەپ ۇشقان شاكىرتتەرىمىز ەلدىڭ ماقتانىشىنا اينالسىن»، – دەدى ۆودنىي كەنتىنىڭ تۇرعىنى سوۆەت توعىزباەۆ.
قازىرگى ۋاقىتتا وبلىستا «كەلەشەك مەكتەپتەرى» ۇلتتىق جوباسى اياسىندا ەكى مەكتەپ سالىنىپ جاتىر. اياگوز قالاسىنداعى 600 ورىندىق مەكتەپ 2-ءىنشى توقساندا پايدالانۋعا بەرىلمەك. سەمەيدىڭ شىعىس كەنتىندە 300 ورىندىق مەكتەپتىڭ قۇرىلىسى جۇرگىزىلۋدە. جالپى وبلىستاعى 8200 ورىن تاپشىلىعىنىڭ 31 پايىزى وسى جوبامەن سالىنىپ جاتقان 5 مەكتەپ ەسەبىنەن شەشىلمەك. قالعان تاپشىلىقتى جويۋ ءۇشىن رەسپۋبليكالىق بيۋدجەت ەسەبىنەن الداعى ءۇش جىلدا 11 مەكتەپ سالۋ جوسپارلانعان.
اپاتتى جاعدايدا دەپ تانىلعان ءۇش مەكتەپتىڭ ماسەلەسى دە كەزەڭ-كەزەڭىمەن شەشىلىپ كەلەدى. جارما اۋدانىنىڭ سۋىقبۇلاق اۋىلىندا 100 ورىندىق جاڭا مەكتەپتىڭ قۇرىلىسى باستالدى. اقسۋات اۋدانىنداعى ەكپىن اۋىلىندا 300 ورىندىق مەكتەپتىڭ قۇرىلىسى باستالادى. سەمەيدەگى №11 مەكتەپتىڭ ورنىنا جاڭا مەكتەپ سالۋعا قۇجات ازىرلەنىپ جاتىر.
اباي وبلىسىندا 304 مەكتەپ بار. ءبىلىم وشاقتارىندا 101 مىڭنان استام بالا ءبىلىم الادى. 12 مىڭنان استام ۇستاز ەڭبەك ەتەدى. بيىل 10 مىڭنان اسا ءبۇلدىرشىن العاش رەت 1-سىنىپقا بارادى.
