مەملەكەت باسشىسى قاسىم-جومارت توقاەۆ بارشا قازاقستاندىقتاردى كونستيتۋتسيا كۇنىمەن قۇتتىقتادى، دەپ حابارلايدى "ادىرنا" ۇلتتىق پورتالى.
پرەزيدەنتتىڭ ايتۋىنشا، وسىدان 30 جىل بۇرىن رەفەرەندۋمدا قابىلدانعان اتا زاڭ – تاۋەلسىزدىكتىڭ، مەملەكەتتىلىكتىڭ بەرىك تۇعىرىنا اينالدى. كونستيتۋتسيا ۇلتتىڭ بۇگىنى مەن بولاشاعىن ايقىندايتىن قۇندىلىقتاردى قامتىپ، بارلىق ازاماتتىڭ قۇقىعى مەن مۇددەسىن تەڭ قورعايدى.
“بارشاڭىزدى كونستيتۋتسيا كۇنىمەن قۇتتىقتايمىن! وسىدان 30 جىل بۇرىن وتكەن رەفەرەندۋمدا حالقىمىز اتا زاڭىن قابىلداپ، تاريحي تاڭداۋىن جاسادى. كونستيتۋتسيامىز قازاقستان رەسپۋبليكاسى تاۋەلسىزدىگىنىڭ، قازاق مەملەكەتتىلىگىنىڭ بەرىك تۇعىرىنا اينالدى. وندا ۇلتىمىزدىڭ بۇگىنىن جانە بولاشاعىن ايقىندايتىن مىزعىماس قۇندىلىقتار مەن قاعيداتتار ناقتى كورىنىس تاپتى. اتا زاڭ قازاقستاننىڭ بارلىق ازاماتىنىڭ مۇددەسىن ۇلتىنا، دىنىنە قاراماستان بىردەي قورعايتىن الەۋمەتتىك مەملەكەت رەتىندەگى قۇقىقتىق ىرگەتاسىن قالىپتاستىردى. كونستيتۋتسيا قوعامدىق كەلىسىم مەن ىشكى تۇراقتىلىقتىڭ باستى كەپىلى سانالادى. سان ءتۇرلى سالاداعى جەتىستىكتەرگە وسى نەگىزگى زاڭىمىزعا سۇيەنە وتىرىپ قول جەتكىزدىك”، – دەلىنگەن قۇتتىقتاۋدا.
پرەزيدەنت توقاەۆ ءۇش جىل بۇرىن جۇزەگە اسقان اۋقىمدى كونستيتۋتسيالىق رەفورمانى اتاپ ءوتتى. ونىڭ باستى ناتيجەسى – «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» تۇجىرىمداماسى نەگىزىندە ساياسي جۇيەنىڭ جاڭعىرۋى. سونداي-اق رەفورما اياسىندا ادام قۇقىقتارىن قورعاۋعا، زاڭ ۇستەمدىگىن ورنىقتىرۋعا باسىمدىق بەرىلىپ، بىرقاتار جاڭاشىل ەرەجەلەر ەنگىزىلگەنىن جەتكىزدى.
«ادىلەتتى، تازا، قۋاتتى ءارى قاۋىپسىز قازاقستان قۇرۋ ءۇشىن ءاربىر ازامات كونستيتۋتسيانى قۇرمەتتەپ، ونىڭ بارلىق ەرەجەسىن مۇلتىكسىز ساقتاۋى قاجەت»، – دەدى پرەزيدەنت.
مەملەكەت باسشىسى ءسوز سوڭىندا قازاقستاندىقتارعا زور دەنساۋلىق، باق-بەرەكە جانە جاسامپاز ەڭبەك تىلەدى.
