الماتىدا زامانبەك نۇرقادىلوۆتىڭ 80 جىلدىعىنا وراي ەسكە الۋ اسى ءوتتى، دەپ حابارلايدى "ادىرنا" ءتىلشىسى.
مەملەكەت جانە قوعام قايراتكەرى، ساياساتكەر زامانبەك نۇرقادىلوۆتىڭ تۋعانىنا 80 جىل تولۋىنا وراي الماتىدا اس بەرىلدى. جيىن بارىسىندا ساياساتكەردىڭ ءومىر سۇرگەن جىلدارىنداعى ەستەلىكتەرى ايتىلىپ، تۋعان اۋىلىنا ەسكەرتكىش قويىلاتىنى دا ايتىلدى.
ەسكە الۋ جيىنىنا پرەزيدەنتتىڭ كەڭەسشىسى ءارى ءباسپاسوز حاتشىسى بەرىك ءۋالي ارنايى قاتىسىپ، مەملەكەت باسشىسى قاسىم-جومارت توقاەۆتىڭ جازعان حاتىن وقىپ بەردى.
"قۇرمەتتى قاۋىم! بيىل بەلگىلى مەملەكەت جانە قوعام قايراتكەرى زامانبەك نۇرقادىلوۆتىڭ تۋعانىنا 80 جىل تولدى. تاۋەلسىز قازاقستان تاريحىندا ەل مۇددەسى ءۇشىن ايانباي ەڭبەك ەتكەن ازاماتتار از ەمەس. زامانبەك قالابايۇلى – وسىنداي تۇعىرلى تۇلعالاردىڭ ءبىرى. ول ەگەمەندىكتىڭ العاشقى كەزەڭىندە كوپتەگەن جاۋاپتى قىزمەتتى ابىرويمەن اتقاردى. مەملەكەتتىگىمىزدى نىعايتۋعا ايرىقشا اتسالىسىپ، وڭىرلەردى وركەندەتۋگە زور ۇلەس قوسقانى داۋسىز. ۇلت پەرزەنتتەرىنىڭ ەسىمىن ەل جادىندا جاڭعىرتىپ، ەڭبەگىنە لايىقتى باعا بەرۋ – ۇرپاق پارىزى. وسى ورايدا، زاكەڭنىڭ تۋعان جەرى – الماتى وبلىسىنىڭ كەگەن اۋدانىندا وعان ەسكەرتكىش ورناتۋ جانە الماتىداعى تۇرعان ۇيىندە ەسكەرتكىش-تاقتا اشۋ قاجەت دەپ سانايمىن. "تاريح – تارازى" دەپ بەكەر ايتىلماعان. حالقىمىزدىڭ كەسەك تۇلعالى ازاماتىنىڭ ەلگە سىڭىرگەن ەڭبەگى ەشقاشان ۇمىتىلمايدى. بارشاڭىزعا زور دەنساۋلىق، باق بەرەكە تىلەيمىن! ەلىمىز امان، جۇرتىمىز تىنىش بولسىن!", – دەلىنگەن حاتتا.
مەملەكەت جانە قوعام قايراتكەرى زامانبەك نۇرقادىلوۆ ءومىرىنىڭ سوڭىنا قاراي وپپوزيتسيالىق ساياساتكەر رەتىندە كوپشىلىك ەسىندە قالدى. ول سول كەزدەگى پرەزيدەنت نۇرسۇلتان نازارباەۆتى وتكىر سىنايتىن. 2005 جىلى ءوز ۇيىندە بەلگىسىز جاعدايدا قازا تاپقان ونىڭ ءولىمىنىڭ سىرى ءالى اشىلعان جوق. رەسمي حابارلاردا ء"وز-ءوزىن قارۋمەن بىرنەشە مارتە اتتى" دەلىندى. 15 قاڭتار - ساياساتكەردىڭ تۋعان كۇنى.
